Քաղաքագետ Ալեքսանդր Մարկարովից «Առաջին լրատվական»-ը հետաքրքրվեց` հետևե՞լ է արդյոք «Հայաստան» համահայկական հիմնադրամի ամենամյա հեռուստամարաթոնին և ի՞նչ է կարծում` կարո՞ղ է արդյոք Ռուսաստանից եկած 12,100.000 դոլարն ունենալ որևէ քաղաքական ենտատեքստ: Վերջինս պատասխանեց, որ տարբեր երկրներից հիմնադրամին հատկացված գումարների չափը պետք է պայմանավորել այլ գործոններով:
«Խոսքն այստեղ կարող է գնալ ոչ թե քաղաքական ենթատեքստի, այլ տնտեսական իրավիճակի հետ կապված:Հարաբերականորեն ավելի ծանր վիճակ է միգուցե այն երկրներում, որտեղից քիչ գումար է եկել.շատ երկրներ այսօր գտնվում են խոր ճգնաժամային ժամանակաշրջանում: Եթե ուշադրություն դարձնենք Ռուսաստանից եկած գումարներին, ապա բավականին մեծ գումար հատկացվեց ընդամենը մի քանի անձանց կողմից, որն էլ համապատասխանաբար Ռուսաստանի ներդրումը այս մարաթոնի հետ կապված բարձրացրեց:
Իսկ Միացյալ Նահանգներից գումարները գալիս էին տարբեր անձանցից, բայց հարաբերականորեն ավելի փոքր չափերով: Կարծում եմ` սխալ կլինի այստեղ քաղաքական աստառ որոնել, խոսքը գնում է ավելի շատ այն բիզնեսների մասին, որոնցով հայերն այսօր զբաղվում են Ռուսաստանում, և որոնց միջոցով էլ այնտեղից ավելի շատ գումար հատկացվեց հիմնադրամին:
Չեմ կարծում նաև, որ ընդհանուր գումարի չափի նվազումն այս տարի պայմանավորված է սփյուռքի կողմից Հայաստանի հանդեպ անվստահությամբ, եթե անվստահության փաստը լիներ, շատ ավելի քիչ գումար կլիներ: Կարծում եմ` այստեղ հարցն ուղղակի հնարավորությունների մեջ է:Ի լրացումն կարելի է նշել, որ մարաթոնը միակ միջոցառումը չէ, որի շրջանակներում գումարներ են ուղարկվում Հայաստանի, Լեռնային Ղարաբաղի, սիրիահայերի օժանդակության համար և այլն: Դա ևս մեկ գործոն է, որը կարող է բացատրել գումարի չափի այս տարվա նվազումը:
Իսկ ընդհանուր առմամբ, կարծում եմ` պետք է մարաթոնի կազմակերպիչներն ասեն`իրենց գոհացնո՞ւմ է գումարի այն չափը, որը կարողացան հավաքել, թե՞ ոչ»:
