ԱՄՆ-ում աբսուրդ կլիներ, եթե ընտրություններից 2 ամիս առաջ հանրապետականներն իրենց թեկնածուին որոշած չլինեին: Այսօր «Առաջին լրատվական»-ի հետ զրույցում այս մասին ասաց քաղաքական և ընտրական տեխնոլոգիաների փորձագետ Արմեն Բադալյանը՝ համեմատական անցկացնելով ԱՄՆ նախագահական ընտրությունների նախընտրական երկու ամիսների և հայաստանյան նույն ժամանակահատվածի միջև:
Նա հիշեցրեց, որ ԱՄՆ-ում նախագահական ընտրություններն անցկացվեցին նոյեմբերի 6-ին, և դեռ սեպտեմբերից դեմոկրատները գիտեին, որ իրենց թեկնածուն Օբաման է:
«Իսկ եթե սեպտեմբեր ամսին հանրապետականները դեռևս չիմանային, թե ով է իրենց թեկնածուն, աբսուրդ կլիներ: ԱՄՆ-ում նման բանն անհնար է, որովհետև այն ժողովրդավարական երկիր է: Քանի որ Հայաստանը ժողովրդավարական երկիր չէ, հասարակությունը իներտ վիճակում է, չի հետաքրքրվում նախագահական ընտրություններով, նորմալ է, որ ԲՀԿ-ն ձգձգում է գալիք նախագահական ընտրություններին իր մասնակցության մասին որոշումը հրապարակելը: Հասարակության իներտ վիճակը հաշվի առնելով՝ ինչո՞ւ ակտիվ քարոզարշավ անցկացնել: Կգա ժամկետը` կասեն»,- մեկնաբանեց Արմեն Բադալյանը:
Նա նշեց, որ այս պահին պարզ չէ, թե ԲՀԿ բանակցություններն ինչ փուլում են, ինչ որոշում կա: «Մինչև դիրքորոշում հայտնելը` նախակուլիսային բանակցային գործընթաց է տեղի ունենում: Հիմա բանակցում են, թե ոչ` դեռ չեմ կարող ասել: Մինչև վերջնական որոշման չգան` վերջնական մեսիջներ չեն լինի»,- եզրափակեց քաղաքական և ընտրական տեխնոլոգիաների փորձագետ Արմեն Բադալյանը:
Հիշեցնենք, որ լրատվամիջոցներից մեկի հետ զրույցում ԲՀԿ առաջնորդ Գագիկ Ծառուկյանը նշել էր, որ արդեն որոշում ունի գալիք նախագահական ընտրությունների վերաբերյալ, սակայն օգտվում է ընտրական օրենսդրության ընձեռած` որոշումը չհրապարակելու հնարավորությունից:
