«Ես ոչ միայն Սմբատ Այվազյանի հետ ունեմ լուրջ տարաձայնություններ, այլ նաև քաղխորհրդի անդամ Ռաֆիկ Մկրտչյանի հետ»,- Aravot.am-ի հետ զրույցում ասաց «Հանրապետություն» կուսակցության քաղխորհրդի անդամ Սուրեն Աբրահամյանը` խոսելով մամուլում հրապարակված այն տեղեկության մասին, որ իր և Սմբատ Այվազյանի միջև լուրջ տարաձայնություններ կան:
Թերթը Սուրեն Աբրահամյանին խնդրեց պարզաբանել իր տարաձայնությունները կուսակցության քաղխորհրդի անդամների հետ: «Ռաֆիկ Մկրտչյանի հետ տարաձայնությունները հետևյալն են` ես բացատրում եմ Ռաֆայել Սերգեյիչին, որ աշնան թափված տերևները պետք է աշնանը հավաքվեն, ինքը «բեյնը մտցրել է», որ չէ, պետք է գարունը հավաքվեն: Իսկ Սմբատ Այվազյանին տասը տարի է` ասում եմ, որ քո` հրաշալի նարդի խաղալը պայմանավորված է զառով, ինքն էլ ասում է` չէ, իմ խաղաոճով: Այնպես որ, խիստ տարաձայնություններ ունենք մենք»,- հեգնեց պարոն Աբրահամյանը:
«Առավոտ»-ը հետաքրքրվեց` ինչպե՞ս են պատրաստվում հարթել այդ տարաձայնությունները: Աբրահամյանը հույս հայտնեց, որ նախագահական ընտրությունների շեմին այդ բոլորը կհարթվեն: Հարցին` միասնական թեկնածուո՞վ եք հանդես գալու, ասաց` «Այո, այո»: