ՀՀ գործող նախագահ Սերժ Սարգսյանից ազատվելու համար ՀԱԿ համագործակցությունը ԲՀԿ-ի հետ ընդունելի է: Սերժ Սարգսյանն իր պաշտոնավարման տարիների ընթացքում չբացահայտեց «Մարտի 1»-ը, և պարզվեց` ավելի վատն է, քան ՀՀ երկրորդ նախագահ Ռոբերտ Քոչարյանը: Այսօր «Առաջին լրատվական»-ի հետ զրույցում այս մասին ասաց 2008թ. «Մարտի 1»-ի զոհ Տիգրան Խաչատրյանի մայրը` Ալլա Հովհաննիսյանը:
Նա նշեց, որ այն, ինչ «Մարտի 1»-ի զոհերի հարազատներին էր ներկայացվում, ողբերգական իրադարձության բացահայտումը ի չիք դարձրեց: «Մենք իր հետ ինչ-որ հույս էինք կապում, կարծում էինք` ինքն այդքան ահավոր գործիչ չէ, ինչպես Քոչարյանը: Մտածում էինք, որ այն ամենը, ինչ «Մարտի 1»-ին կատարվեց, Քոչարյանի հրահանգով էր, Սերժ Սարգսյանի ցանկությամբ չէր: Սակայն նա մեզ հակառակն ապացուցեց, այդ պատճառով ես իրեն դեմ գնալու յուրաքանչյուր քայլ ողջունում եմ: Եթե ինքը մնա իշխանության, մեր հարցն էլի ծեծված կմնա: Կոնկրետ այս պահին ինձ միայն դա է հետաքրքրում: Միայն դրա համար ես ցանկացած համագործակցության համաձայն եմ: Իրենից ազատվելու համար ես ամեն ինչի համաձայն եմ:
Ես չեմ գտնում, որ ԲՀԿ-ի ետևում Քոչարյանն է կանգնած, որովհետև չեմ կարծում, թե ԲՀԿ-ն պետք է այնքան հիմար լինի, որ Քոչարյանի (որին կարծում եմ` ոչ ոք չի ցանկանում տեսնել) կողքին կանգնի»,- մեկնաբանեց իր տեսակետը Ալլա Հովհաննիսյանը:
Նրա կարծիքով՝ այս տարիների ընթացքում գործող նախագահը ինչ-որ կերպ պետք է ապացուցեր, որ ինքն այդքան էլ կողմ չի եղել մարտիմեկյան սպանություններին` հանուն իր աթոռի: Իսկ այսօր Ալլա Հովհաննիսյանն այն համոզմանն է, որ «Մարտի 1»-ի ամենամեծ շահառուն եղել է Սերժ Սարգսյանը:
«Օսկանյանը ևս Մարտի 1-ին հակասահմանադրական քայլ կատարեց՝ գնաց ԱԺ, հայտարարություն տարածեց: Ես Օսկանյանին չեմ ընդունում, բայց այս դեպքում նրանց համագործակցությունը Սերժ Սարգսյանի դեմ ողջունում եմ»,- նկատեց նա:
Անդրադառնալով գալիք նախագահական ընտրություններին՝ նա ասաց, որ չգիտի, թե ով կառաջադրվի` Ծառուկյանը, Օսկանյանը, Լևոն Տեր-Պետրոսյանը, թե մեկ ուրիշը, բայց, ամենայն հավանականությամբ, ինքը կսատարի Լևոն Տեր-Պետրոսյանին: «Որ Քոչարյանը կգա` չեմ հավատում: Համոզված եմ, որ նա չի առաջադրվի»,- եզրափակեց Ալլա Հովհաննիսյանը:
