«Հրապարակ»-ը գրում է, որ երեկ «Ազատություն» ռադիոկայանը տեղեկություն հաղորդեց, թե «ԲՀԿ առաջնորդն առաջիկա օրերին կուսակցության կողմից կառաջադրվի Հայաստանի նախագահի թեկնածու: Այսօր «Ազատություն» ռադիոկայանի հետ զրույցում այդ մասին տեղեկացրեց ԲՀԿ խորհրդարանական խմբակցության քարտուղար Նաիրա Զոհրաբյանը»: Մի քանի ժամ անց արդեն այս լուրը չկար «Ազատության» կայքում, այն փոխարինվել էր «Առաջիկայում կորոշվի, թե ով կներկայացնի ԲՀԿ-ն նախագահական ընտրություններում» վերնագրով տեղեկատվությամբ, որտեղ շեշտադրումները փոխվել էին և նշվել էր` ԲՀԿ-ն «նախագահական ընտրություններին մասնակցելու ձևաչափի վերաբերյալ դեռևս որոշում չունի»:
Երեկ երեկոյան, ԲՀԿ քաղխորհրդի նիստից հետո լուր տարածվեց, որ այսօր Ծառուկյանը հանդես է գալու իր առաջադրման մասին հայտարարությամբ:
