«Մարտի 23–ի շարժման» (М23) ապստամբները, գրավելով Կոնգոյի Դեմոկրատական Հանրապետության հարավում գտնվող ռազմավարական նշանակության Գոմա քաղաքը, հայտարարել են, որ մտադիր են շարժվել դեպի մայրաքաղաք Կինշասա և վերահսկողություն սահմանել ամբողջ պետության վրա: Սակայն սկզբում նրանք կգրավեն հարևան նահանգի՝ Հարավային Կիվուի մայրաքաղաք Բուկավուն։ Այս մասին հայտարարել են ապստամբները:
«Այժմ մենք կշարժվենք դեպի Կինշասա: Մենք կմիավորենք երկիրը»,- հայտարարել է խմբավորման ներկայացուցիչ Վիանի Կազարման Գոմայի մարզադաշտում տեղի ունեցած միտինգի ժամանակ: Կազարման վստահեցրել է, որ ապստամբներն արդեն վերահսկում են Սակե քաղաքը, որը գտնվում է Գոմայից 27 կմ հեռավորության վրա՝ Բուկավուի ճանապարհին, և շուտով կվերցնեն Նաև Կիվու լճի ափին գտնվող Մինովա քաղաքը:
Ինչպես տեղեկացնում են ԶԼՄ-ները, ապստամբների պահանջով այսօր Գոմայի մարզադաշտ են ներկայացել և իրենց զենքն են հանձնել 2,1 հազար կառավարական զինվորներ և 700 ոստիկաններ:
Միաժամանակ ԿԴՀ-ի վարչապետ Ավգուստին Մատատա Պոնյո Մալոն հայտարարել է, որ «տանուլ է տրվել ճակատամարտը, բայց ոչ պատերազմը», և պետության փլուզումը բացառվում է:
Ավելի վաղ ՄԱԿ-ի անվտանգության խորհուրդը միաձայն որոշել էր Կոնգոյում գործող М23 շարժման ապստամբների դեմ պատժամիջոցներ կիրառել: Փաստաթղթի տեքստը, որը առաջարկվել է Ֆրանսիայի կողմից, ունի կոշտ և քննադատող բովանդակություն:
ՄԱԿ ԱԽ-ն պահանջել է ապստամբներից անմիջապես դադարեցնել ռազմական, ինչպես նաև մարդու իրավունքների ոտնահարման ցանկացած գործողություններ: Նրանցից պահանջել են նաև զինաթափվել:
ՄԱԿ-ի փորձագետները նշել են նաև, որ հարևան Ուգանդան և Ռուանդան ապստամբներին ցուցաբերում են ֆինանսական և նյութատեխնիկական աջակցություն:
Ինչպես տեղեկացնում է РБК-ն, այս որոշումն ապստամբների կողմից ընդունվել է Հյուսիսային Կիվու նահանգի վարչական կենտրոնի գրավումից հետո:
