Շվեդական Գյոտերբորգ քաղաքում 37-ամյա բնակչուհուն պաշտոնական մեղադրանք է առաջադրվել ննջեցյալների հանգիստը խանգարելու համար:
Ինչպես գրում է Göteborgs-Posten թերթը՝ կնոջ բնակարանում հայտնաբերվել են կմախքի մասեր, այդ թվում՝ վեց գանգ, մեկ ողնաշար և բազմաթիվ ոսկորներ:
Քննիչները պնդում են, որ մահացածների մարմնի մասերի մի հատվածը կիրառվել է կնոջ կողմից «տարբեր սեռական նպատակներով»: Նրանց խոսքերով՝ նեկրոֆիլիայի ապացույցները չափազանց շատ են:
Դատախազության ներկայացուցիչները հայտարարել են, որ բնակարանի ստուգման ժամանակ հայտնաբերվել են «Իմ նեկրոֆիլիան» և «Իմ առաջին փորձը» անվանումներով սկավառակներ, որոնք կցվել են գործին՝ որպես ապացույցներ:
Ոստիկանները թաքստոցում հայտնաբերել են դիահերձարաններում կատարված լուսանկարներ, բազմաթիվ դանակներ, շաղափ և պարկեր՝ հանգուցյալների մարմինները տեղափոխելու համար:
Göteborgs-Posten-ը հաղորդում է նաև, որ բնակարանում հայտնաբերվել է նաև գյուղական դիահերձարաններից մեկի մուտքի գաղտնաբառը:
«Լուսանկարներից մեկում երևում է, թե ինչպես է կինը լիզում գանգը»,- The Local պարբերականը մեջբերում է դատախազ Քրիսթին Էրենբորգ-Սթաֆֆասի խոսքերը:
Դրա հետ մեկտեղ, ոստիկանությունը ոչ մի ապացույց չունի, որ կասկածյալը սեփական ձեռքերով է գերեզմանից հանել աճյունները:
Սեպտեմբերին ձերբակալված կնոջը կասկածել են սպանության մեջ:
Ձերբակալվածն ընդունում է, որ իր տանը պահել է կմախքի ոսկորներ ու գանգ, սակայն հերքում է, որ ինչ-որ ապօրինի քայլ է կատարել:
Նա հայտնել է, որ ոսկորները հավաքել է հետաքրքրությունից դրդված:
Հետազոտողները նաև տվյալներ ունեն, որ մեղադրյալը գանգեր և ոսկորներ է վաճառել համացանցով:
Շվեդական օրենքներով՝ ննջեցյալների հանգստի խախտման համար հասնում է մինչև երկու տարվա ազատազրկում:
