Առաջիկա հայաստանյան նախագահական ընտրություններում առաջադրվելու վերաբերյալ ձեր հայտարարությունը մնո՞ւմ է ուժի մեջ, երեկ սույն հարցը «Հայկական ժամանակ»-ի թղթակիցն ուղղել է «Նոր ժամանակներ» կուսակցության նախագահ Արամ Կարրապետյանին: «Այո, դեռ մնում է ուժի մեջ»,- ասել է Կարապետյանը: Իսկ ինչո՞ւ դեռ, այսինքն` չի բացառվում, որ ինչ-որ պահի ինչ-որ մեկի օգտին հանե՞ք ձեր թեկնածությունը, փորձել է ճշտել թղթակիցը:
«Ես ընտրություններին նախապատրաստվել եմ և պատրաստ եմ ամեն ինչով, բայց խորհրդարանական ընտրություններից հետո ոչինչ չի փոխվել, էլ ավելի վատթարացել է ամեն ինչ: Եթե մասնակցությունը պիտի լինի այն ձևով, ինչ խորհրդարանական ընտրությունների ժամանակ, այսինքն` պլանավորված ինչ-որ ձևով, որից հետո ոչ մի քաղաքական գործընթաց չգնաց, եթե հիշում եք, ինչ-որ թվեր ստացան, դրանց համաձայնեցին, և հետընտրական ոչ մի ալիք չեղավ, հիմա, եթե նույն բանը պիտի ունենանք նախագահական ընտրություններում, ապա ստացվում է, որ պայքարելու այդ ձևը զուտ լեգիտիմացնելու է իշխանությանը»,- ասել է Արամ Կարապետյանը:
Ըստ նրա, իշխանությունը մարդիկ է փնտրում, որ առաջադրի և ասի, որ մրցակցային ընտրություններ են տեղի ունեցել: «Եթե լուրջ ընդդիմադիր քաղաքական ուժերը կարող են գտնել ձևաչափ, որով նախագահական ընտրությունները վերածեն ալիքի, և այդ ալիքը բերի որոշակի շատ լուրջ փոփոխությունների, ուրեմն, այս պահին մասնակցությունը ճիշտ է, անկախ նրանից, թե քանի տոկոս կգրեն: Եթե դա այդպես չի լինելու, ուրեմն, ես կարծում եմ, մասնակցությունն անիմաստ է, և պետք է պատրաստվել ապագա գործողությունների, որը, իմ տեսակետից, Հայաստանում կարող է լուրջ իրավիճակ փոխել, որովհետև տնտեսական իրավիճակը, գեոքաղաքական հարցերը գնալով վատթարացնելու են Հայաստանի վիճակը: Եթե բան չեն փոխելու, ոչ պաշտոնը, ոչ այդ ազգային համաձայնության կառավարությունը, ոչ իրենց այդ զուր բանակցությունները, իմ տեսակետից, Հայաստանին ոչինչ չեն տալու»,- ասել է «Նոր ժամանակներ» կուսակցության նախագահ Արամ Կարապետյանը:
