Երկրորդ աշխարհամարտի ավարտից հետո առաջին անգամ աշխարհում փախստականների թիվը հասել է 51,2 մլն-ի, ինչը համարժեք է Իսպանիայի կամ ՀԱՀ-ի բնակչության թվին: Ria Novosti-ի տեղեկացմամբ՝ այս մասին ասված է ՄԱԿ-ի փախստականների հարցերով գերագույն կոմիսարի վարչության (ՓԳԿՎ) 2013 թվականի զեկույցում:
«Խաղաղության դեֆիցիտն արտացոլում է համաշխարհային հանրության անընդունակությունը առաջին հերթին՝ կանխելու հակամարտությունները, երկրորդ՝ լուծում գտնելու արդեն գոյություն ունեցող խնդիրներին»,- ասել է ՓԳԿՎ ղեկավար Անտոնիո Գուտյերեսը: Նրա խոսքով՝ հումանիտար կազմակերպությունները չեն կարող ինքնուրույն կարգավորել այդ գործընթացները:
Զեկույցի տվյալներով՝ առանց մեծահասակների խնամքի մնացած երեխաների դիմումները դարձել են անցած տարվա վախեցնող միտում: 2013թ. ավելի քան 25.000 երեխաներ առանց ծնողների ուղեկցության ապաստան տրամադրելու խնդրանքով դիմել են 77 երկրների:
2013թ. փախստականների թիվը հասել է ՀԱՀ-ի, Իսպանիայի և Հյուսիսային Կորեայի բնակչության թվի մակարդակին: Մարդկանց իրենց տները և երկրները լքել ստիպող հիմնական գործոններն են՝ կլիմայի փոփոխությունն ու բնակչության աճը, ուրբանիզացիան, պարենային անվտանգության բացակայությունը, ջրի պակասը՝ նշվում է փաստաթղթում:
