Հյուսիսային Կորեայում մեծ տարածքները տառապում են երկարատև երաշտից, որը կարող է դառնալ ամենաուժեղը 2001 թվականից ի վեր, հայտնում է ՑՏԱԿ գործակալությունը:
ՑՏԱԿ-ի տեղեկությամբ՝ երկրում դեռ գարնանից շատ բարձր ջերմաստիճան է արձանագրվել, իսկ Հյուսիսային Կորեայի մայրաքաղաք Փխենյանում և այլ արևմտյան շրջաններում ամառվա սկզբից տարեկան տեղումների մակարդակի զգալի անկում է նկատվում:
Փորձագետները վախենում են, որ երաշտը Հյուսիսային Կորեայում կարող է վատացնել երկրի առանց այն էլ ցավալի պարենային վիճակը: Մասնավորապես, երաշտը սպառնում է ցորենի և եգիպտացորենի բերքին:
Ներկայումս երկրի իշխանությունները փորձում են պարզել վնասի ստույգ չափը:
ՄԱԿ-ի տվյալենրով՝ Հյուսիսային Կորեայի բնակիչների ընդունած սննդի օրական նորման վերջին ամիսներին կազմել է 420 գրամ՝ նախատեսվող 600 գրամի փոխարեն: 2013թ. Հյուսիսային Կորեայում բնակչության մոտ 46%-ն ընդունել է «բավարար քանակի» սնունդ: Մոտ 17%-ը ստացել է «սահմանափակ» սնունդ, իսկ 38%-ը եղել է «սովի շեմին»:
