News Georgia-ի փոխանցմամբ՝ Վրաստանի զինված ուժերի Միացյալ շտաբի նախկին պետ Գեորգի Կալանդաձեին նոր մեղադրանք է ներկայացվել: Այս մասին լրագրողների հետ զրույցում հայտարարել է Կալանդաձեի փաստաբան Գոգիտա Գաբաիձեն:
Վերջինիս խոսքերով՝ նոր մեղադրանքն առնչվում է Վրաստանի քրեական օրենսգրքի (ՔՕ) 143-րդ հոդվածի 2-րդ կետին՝ ապօրինի ազատազրկում: Նա մանրամասնել է, որ խոսքը Վրաստանի քաղաքացի Զվիադ Աբեսաձեին ազատազրկելու մասին է՝ ընդգծելով, որ նույն գործով անցնում է նաև Վրաստանի պաշտպանության ու ներքին գործերի նախկին նախարար Բաչո Ախալայան:
Գեորգի Կալանդաձեն ձերբակալվել է նոյեմբերի 7-ի գիշերը՝ մեղադրվելով ծառայողական լիազորությունների չարաշահման մեջ (ՔՕ 333-րդ հոդված)՝ կապված երկու դրվագի հետ: Նոյեմբերի 9-ին Թբիլիսիի քաղաքային դատարանը նրան 20,000 լարի (մոտ 12,000 դոլար) գրավի դիմաց ազատ է արձակել: Նոյեմբերի 13-ին դատարանը գրավի չափը մեծացրել էր մինչև 30,000 լարի (18,000 դոլար):
