Մասիս քաղաքից մոտ մեկ կիլոմետր հեռավորության վրա գտնվող աղբավայրը ամեն օր այրվում է և օդը լցնում գարշահոտությամբ՝ Մասիսի բնակիչների շրջանում առաջացնելով տարբեր հիվանդություններ:
«Իսկական ցեղասպանություն է մեր ջուր խմելը, մեր օդը շնչելը: Ամբողջ աղբը Երևանից բերում են, վառում Մասիս քաղաքում: Ժողովուրդը հիվանդ է, ամբողջ կոյուղին լցվում է շենքի հետևում, քանի որ չկա կոյուղի, ո՞վ պետք է անի: Ընտրություններին խոստումներ՝ ինչքան ասես, 20 տարի է՝ տառապում եմ մալարիա հիվանդությամբ»,- ասաց Մասիսում բնակվող տիկին Գյուլնարան, որի դեմքը դալկացել է երկարատև հիվանդությունից:
Հովիկ Աբրահամյանը Մասիս է եկել ընտրության ժամանակ, խոստացել է խնդիրները լուծել, բայց չի կատարել խոստումը: «Ո՞ւր գնանք փախչենք, ի վիճակի չենք փախչելու: Երկու տարի է՝ այս ծուխն ենք շնչում»,- ասաց նա:
Քաղաքում օդն էլ ավելի է աղտոտվել երբ սկսել են աղբ բերել նաև Երևանից՝ ապրելը դարձնելով անհնար: «Արդեն ստորագրահավաք են արել, լուծում են պահանջում հարցին: Մի պատուհան չեն կարողանում բացել, էս շոգ ու կրակին»,-դժգոհեցին բնակիչները:
«Թող գան, մի օր մեր ջրերը խմեն: Չեն խմի: Հիմա ով կարող է՝ գնում է, ուրիշ տեղերից բերում, ջուրը լցնում են: Ջրի տակ երկու օրից կանաչ մամուռ, ինչքա՞ն լռենք»,- ասացին նրանք:
Մասիսի քաղաքապետ Սաշա Հակոբյանը «Առաջին լրատվական»-ի հետ զրույցում նշեց, որ հանրապետության բոլոր քաղաքներն ունեն աղբավայր: Գյուղերից, Երևանից բերում են աղբ, շատ գյուղեր չունեն աղբավայր, քանի որ տարածք չունեն: Նա նշեց, որ եթե քամի չկա, հանգիստ է, ոչ մի խնդիր չկա, քամու դեպքում պատահում է, որ ծուխ է լինում:
Նա խնդիրը դիտարկում է հետևյալ կերպ. «Մարդիկ էս վերջին տարիներին ինչ-որ բաների վրա մի փոքր զայրացած են, արագ են վրդովվում, արագ արձագանքում են»:
«Աղբ ա, աղբի հոտ պիտի գա: Եթե մտածում են՝ աղբից պետք է դուխու հոտ գա, ներողություն եմ խնդրում: Ցայտաղբյուրի ջուրն էլ մաքուր ջուր է: Արտեզյան ջրեր են, բայց մաքուր են»,- պնդեց քաղաքապետը: