ԱՄՆ նախագահ Բարաք Օբաման ուղևորվում է Ասիա: Նա կայցելի Թաիլանդ, Մյանմար և Կամբոջա: Սա նախագահության երկրորդ ժամկետում վերընտրվելուց հետո Օբամայի առաջին արտասահմանյան այցն է: Այս մասին հայտնում է «Ամերիկայի ձայնը»:
Այցն ընդգծում է Օբամայի մեծ հետաքրքրությունն Ասիայի նկատմամբ: Նրա վարչակազմը բազմիցս հայտարարել է, որ ապագայում ասիական ուղղությունը կարևորագույն դեր կխաղա ԱՄՆ-ի արտաքին քաղաքականության և միջազգային հարաբերություններում:
Բարաք Օբաման կդառնա ԱՄՆ առաջին նախագահը, որը կայցելի Մյանմար՝ երկիր, որը տասը տարի շարունակ գտնվում է զինվորական խիստ վերահսկողության ներքո:
Մյանմարի կառավարությունը վերջերս տեղի է տվել միջազգային ճնշմանն ու սկսել ժողովրդավարական բարեփոխումներ իրականացնել, սակայն որոշ իրավապաշտպան կազմակերպություններ նախազգուշացրել են, որ այդ պետությունը դեռևս չի կարելի լիովին ազատ համարել: Human Rights Watch-ի ներկայացուցիչները «Ամերիկայի ձայն»-ին հայտնել են, որ Օբաման չպետք է շտապի այնտեղ այցելել, քանի դեռ Մյանմարում չեն վերականգնվել քաղաքացիների հիմնարար ազատությունները:
Ասիական շրջագայության ընթացքում նախատեսված է Օբամայի հանդիպումը Մյանմարի նախագահ Տեյն Սեյնի և երկրի գլխավոր ժողովրդավարական ակտիվիստ Աուն Սան Սու Չժիի հետ, որին 20 տարվա տնային կալանքից հետո 2010 թվականին ազատ են արձակել: 1991 թվականին նրան շնորհված Խաղաղության Նոբելյան մրցանակը նա կարողացել է ստանալ միայն այս տարի:
