ՊԲ հյուսիսային (Գյուլիստան) ուղղությամբ տեղակայված զորամասերից մեկի, ավելի կոնկրետ՝ «Եղնիկներ» կոչվող զորամասի մարտական հենակետում գլխի շրջանում հրազենային մահացու վիրավորում ստացած զինծառայող, 1994թ. ծնված Դերենիկ Մանուկյանի մահվան լուրը ծնողներին երեկ երեկոյան էր հասել: Լուրն իմանալուց հետո մոր առողջական վիճակը կտրուկ վատացել է, նրան տեղափոխել են հիվանդանոց՝ վերակենդանացման բաժանմունք:
Դերենիկի մասին հարևանները և հարազատները միայն դրական էին խոսում: Մեր այցելության պահին ոչ հրամանատարական կազմից, ոչ պաշտպանության նախարարությունից ծնողներին կատարվածի մասին որևէ տեղեկություն չեն տրամադրել: Ծնողներն ու հարազատները գիտեին այն, ինչ տարածվել է լրատվամիջոցներով:
Դերենիկի հայրը՝ Արամ Մանուկյանը, «Առաջին լրատվական»-ի հետ զրույցում ասաց, որ իր որդին ոչ մի խնդիր չուներ բանակում: Ինքը խոսել է որդու հետ, նա երբեք չի բողոքել որևէ բանից: «Դերենիկը զորամասում ոչ մի խնդիր չուներ: Մայիսի 16-ին քաղաքապետարանը կազմակերպեց, գնացինք տղայիս տեսանք, եկանք: Ոչ մի դժգոհություն չուներ: Անձամբ ես առանձին հետը խոսեցի, ասաց՝ ոչ մի խնդիր չկա, որ իրեն նեղացնեն, բան, ոչ մի այդպիսի բան չկար»,- պատմեց հայրը՝ ավելացնելով, որ դեպքը տեղի է ունեցել դիրքերում, որտեղից պետք է իջնեին այսօր:
Մորաքույրն էլ նշեց, որ Դերենիկը բանակ էր զորակոչվել խնդիրներով՝ -5 տեսողությամբ և ողնաշարի խնդրով: «Տղայիս -5 տեսողությամբ տարել են առաջին գիծ, բացի այդ՝ ողնաշարի խնդիր ուներ, բայց առաջին գծում 12 կիլոգրամանոց գնդացիրը ուսին 20 կլիոմետր բարձրացնում էր»,- բողոքեց Դերենիկի մորաքույրը՝ Կարինե Համբարձումյանը, հավելելով, որ Դերենիկի եղբորը նույնպես նույն առողջական խնդիրներով կրկին զորակոչել են բանակ:
Հարազատները ոչ մի կերպ չէին պատկերացնում, թե ինչպես է հնարավոր զենքի անփույթ օգտագործման դեպքում Դերենիկը գլխից վիրավորվեր: «Ինչի՞ ոտքին, թևին, ուրիշ տեղ չկպավ, հենց գլխին կպավ: Բայց ես ոչ մի բան չեմ կարող ասել՝ մինչև չգան, մանրամասները չասեն»,- հավելեց մորաքույրը:
«Ողջ երեխային տվեցինք բանակին՝ հիմա դիակ ենք ստանում: Էս ա մեր բանակը, մեր պաշտպանության նախարարության աշխատանքը: Սա մի բառով ա կոչվում՝ «բեսպրեդել» կամ «բարդակ»: Ամեն օր մի զինվոր է զոհվում: Ամեն օր մի ամբողջ ընտանիք որբանում ա՝ մենակ էն պատճառով, որ նախարարությունը իր տեղում չի»,- ասաց Դերենիկի հորաքույրը՝ Թամարա Մանուկյանը:
Նշենք, որ այս դեպքով ՊՆ քննչական ծառայությունում հարուցվել է քրեական գործ՝ ՀՀ քրեական օրենսգրքի 373-րդ հոդվածի 3-րդ մասի հատկանիշներով: Քրեական գործի շրջանակներում զենքի հետ վարվելու կանոնները խախտելու հետևանքով անզգուշությամբ մարդու մահ պատճառելու կասկածանքով ՀՀ քրեական դատավարության օրենսգրքի 128-րդ հոդվածի հիմքով ձերբակալվել է պարտադիր ժամկետային զինծառայող, շարքային Վոլոդյա Մանուկի Բաբիկյանը:
Մանրամասները՝ տեսանյութում:
