Լոս Անջելեսի շերիֆի օգնական, ոստիկանության ծառայության վետերան Ֆրանսիսկո Գամեզը ձերբակալվել է սպանության, սպանության փորձի և ծանր քրեական հանցագործություն կատարելու ժամանակ հրազեն կիրառելու կասկածանքով` հաղորդում է The Los Angeles Times թերթը:
41-ամյա Գամեզի դեմ մեղադրանքներ դեռևս չեն ներկայացվել: Թերթի տեղեկություններով՝ սպանության դրդապատճառը եղել է Գամեզի որդու վիճաբանությունը ոմն Արմանդո Կասիլյասի հետ:
Միջադեպը տեղի է ունեցել 2012թ. հունիսին: Նախնական տվյալներով՝ Գամեզի որդին զանգահարել է իրեն և խնդրել գալ: Ոստիկանը ժամանել է նշանակված վայր, մի քանի բառ է փոխանակել Կասիլյասի հետ, որից հետո կրակել է նրա վրա՝ մեքենայից դուրս չգալով: Ստացված վերքերից տղամարդը մահացել է:
Հաղորդվում է, որ այս միջադեպից հետո Գամեզը կրակել է նաև մեկ այլ տղամարդու վրա, սակայն վերջինս չի տուժել: Օգոստոսին The Los Angeles Times թերթի կայքում որպես տուժածի եղբայր ներկայացած տղամարդը գրում է, որ եղբոր սպանության մեջ կասկածում է Լոս Անջելեսի շերիֆին: