Մայիսի 29-ին Աստանայում Եվրասիական տնտեսական միության խորհրդի նիստից հետո պարզ դարձավ, որ Ռուսաստանը Ղրղըզստանին կհատկացնի 1.2 մլրդ դոլար` երկրի տնտեսությունը Մաքսային միության պայմաններին համապատասխանեցնելու և ՄՄ-ին անդամակցելու համար: Այս մասին Ղրղըզստանը խնդրում էր դեռևս նախորդ տարվանից, այնինչ Հայաստանը, լինելով ՌԴ ռազմավարական գործընկեր, չստացավ որևէ օգնություն Հայաստանի՝ ԵՏՄ/ՄՄ անդամակցության ճանապարհային քարտեզի իրագործման համար, թեև նման հրապարակային խնդրանք կամ պահանջ չէր եղել ՀՀ բարձրաստիճան պաշտոնյաների կողմից: Սակայն տեղեկություններ կան, որ Հայաստանը խնդրել է 100 միլիոն դոլար՝ անդամակցության անհրաժեշտ պայմանների համար, սակայն բացասական պատասխան է ստացել՝ խնդրանքը մերժվել է:
«Առաջին լրատվական»-ի հետ զրույցում Ռուսաստանի Դաշնության 1-ին կարգի պետական խորհրդական, Rex գործակալության ղեկավար, քաղաքագետ ՄոդեստԿոլերովն ասաց, որ Ղրղըզստանի ինտեգրացիայի համար նախատեսված ֆոնդը այդ երկրի բյուջետին ուղիղ օգնություն չէ: Ֆոնդը դիտարկելու է պրոյեկտներ և աջակցել է երկու-երեք պրոյեկտի, այլապես այդ գումարները կյուրացվեն: Երկրորդ հերթին, ըստ նրա, Ղրղըզստանը հնչեցնում էր այդպիսի օգնության անհրաժեշտության մասին համարյա թե մեկ տարի շարունակ, անում էր դա հրապարակայնորեն՝ ցանկացած հնարավորության դեպքում: Նրա հստակեցմամբ՝ Հայաստանի կողմից այդպիսի հայտարարություններ չեն եղել:
«Իսկ ով, որտեղ, խոհանոցներում ինչ ասել է, խոհանոցային խոսակցությունների վերաբերմունքն էլ համապատասխան է լինում: Ղրղըզստանը վարել է հրապարակային քաղաքականություն և հասել է իր արդյունքին, որին ես դեմ եմ, բայց նրանք վարեցին հրապարակային քաղաքականություն և հասան իրենց նպատակին, իսկ ի՞նչ է պահանջել Հայաստանը՝ ոչ մեկը չգիտի: Միջազգային հարաբերություններում նման տնտեսական բնույթի կուլիսային պայմանավորվածությունները չեն աշխատել, չեն աշխատում և չեն աշխատելու: Օրինակ՝ Հայաստանի և Ռուսաստանի միջև պարտքերային միջոցառումները գաղտնի էին, կուլիսային, որի պատճառով էլ մինչ այսօր հարուցում են արդարացված քննադատություն: Իսկ Ղրղըզստանն այլ կերպ վարվեց և դրական արդյունք ստացավ»,- ասաց նա՝ հավելելով, որ Հայաստանը Ռուսաստանից նեղանալու տեղ չունի, պետք է այդ մասին քննարկումը հանրային բնույթ կրեր, ոչ թե երկիրը հիմար կարգավիճակում հայտնվեր:
Հարցին՝ ի՞նչ կարելի է սպասել հունիսին, երբ նախանշված է ԵՏՄ-ին ՀՀ անդամակցության համար անհրաժեշտ փաստաթղթի ստորագրությունը, նա պատասխանեց, որ դատելով Սերժ Սարգսյանի հայտարարությունից՝ տարածքային առարկություններ, տարածքային վերջնագրեր չկան, և ուրեմն խոչընդոտներ չկան այդ անդամակցության ճանապարհին: Ուստի, նրա համոզմամբ, եթե ՀՀ-ն պահի իր այդ դիրքորոշումը, ապա կանդամակցի այդ պրոյեկտներին:
