ՆԱՏՕ-ի Խորհրդարանական վեհաժողովում Հայաստանի խորհրդարանական պատվիրակությունը քաղաքական հանձնաժողովի նիստին ի թիվս այլ հարցերի, բարձրաձայնել է նաև Սիրիայի և մասնավորապես Քեսաբի հարցը, նշել, որ ՆԱՏՕ-ի անդամ երկիր Թուրքիան ոչ միայն իր տարածքով թույլ է տվել Քեսաբ ներխուժել զինյալ ապստամբներին, այլ ֆինանսական աջակցություն է ցուցաբերել նրանց։ Պատվիրակության ղեկավար, ՀՀԿ անդամ Կորյուն Նահապետյանը նշեց, թե իրենք ուզում էին պարզել՝ ինչ քայլեր կարող է ձեռնարկել ՆԱՏՕ-ն, որպեսզի նման գործողություններ չձեռնարկվեն: Նահապետյանի խոսքով՝ Թուրքիայի պատվիրակն անմիջապես արձագանքել է, թե իրենց կառավարության կողմից որևէ մասնակցություն չկա Սիրայում և Հալեպում տեղի ունեցող իրադարձություններին, իսլամիստական ապստամբ ուժերին Թուրքիան չի ֆինանսավորում, սակայն դա չի համապատասխանում իրականությանը. բազմաթիվ փաստերով հաստատված է, որ նրանք ուղղակիորեն ներգրավված են այդ գործողություններում:
Լրագրողները հետաքրքրվեցին՝ արդյոք ինչ արձագանք եղավ մյուսների կողմից: Նահապետյանը ցավով նկատեց, որ որևէ արձագանք չեղավ, նրանք պարզապես չարձագանքեցին այդ հարցին:
ՀՀ ԱԺ պատվիրակության անդամ, ԱԺ «Ժառանգություն» խմբակցության պատգամավոր Թևան Պողոսյանը նկատեց, թե ՆԱՏՕ-ն գործընկերների մի համագործակյցություն է, որտեղ չկա ոչ տրադիցիա, ոչ սովորություն՝ գործընկերոջը որևէ կերպ նեղացնելու: «Ցավոք, Հայաստանն անդամակցում է ՀԱՊԿ-ին, որտեղ նման սովորույթ չկա, և ակնկալել, որ որևէ մեկն այնտեղ բաց տեքստով Թուրքիայի վրա մատ թափ կտա, չի կարելի: Գուցե փակ դռների հետևում դա անում են, բայց այն, որ մենք այդտեղ հարցերը բարձրաձայնում ենք, արդեն կարևոր է: Մենք մեր շահերը պաշտպանելով՝ նաև այդ խնդիրները բերում ենք ուշադրության կենտրոն»,- ասաց նա:
Կորյուն Նահապետյանը նշեց, որ ցանկություն կա Երևանում անցկացնել Ռոզ Ռոթ սեմինարը, նա հույս հայտնեց, որ ԽՎ կողմից կլինի համաձայնություն:
«Հայաստանի խաղաղապահ առաքելությունը ներգրավված է ՆԱՏՕ-ի կողմից խաղաղապահ առաքելություններին: Քննարկման ժամանակ մենք առաջարկեցինք ԽՎ ղեկավարությանը, որ իրենց կողմից իրականացվող առաքելություններին՝ Կոսովոյում և Աֆղանստանում, ՀՀ ԱԺ պատգամավորները նույնպես ներգրավված լինեն»,- ասաց նա՝ հավելելով, որ ՀՀ ԶՈՒ մասնակցությունը այդ առաքելությանը բարձր է գնահատվում նրանց կողմից:
Նահապետյանն արդարացված համարեց մտահոգությունները, որ ՆԱՏՕ-Ռուսաստան հարաբերությունների սրման պարագայում որոշակի խնդիրներ կարող են առաջանալ նաև ՆԱՏՕ և գործընկերներ հարաբերություններում: Նրա խոսքով՝ Հայաստան – ՆԱՏՕ երկկողմ հարաբերությունները մանրամասն քննարկվել են արդեն, հարաբերությունների մակարդակն այսօր բավական բարձր է, խորհրդարանական մակարդակում համագործակցությունը ևս բարձր մակարդակի վրա է:
Նահապետյանը նշեց, որ ՆԱՏՕ-ի՝ Ուկրաինային աջակցության վերաբերյալ բանաձևը պարունակում է ակնհայտ հակառուսական ուղղվածություն, սակայն Հայաստանի պատվիրակությունը քվեարկելու իրավունք չունի: «Մեկնաբանությունների, մասնակցության իրավունք ունենք, սակայն չենք կարող մասնակցել քվեարկության: ՌԴ պատվիրակության լիազորությունները դադարեցված են ԽՎ-ում, ողջ քննարկումների ժամանակ գերիշխում էին հակառուսական ուղղվածության ելույթները, մեկնաբանությունները, բայց մի կարևոր հանգամանք կա, հատկապես Ռասմուսենի ելույթում՝ ոչ թե սրել հարաբերությունները ՌԴ հետ, այլ քայլեր ձեռնարկել՝ դրանք բարելավելու համար, քանի որ դա ոչ մի օգուտ չի տա ինչպես ՌԴ, այնպես էլ ՆԱՏՕ-ին»,- ասաց նա: Ու թեև Նահապետյանը կարծում է՝ հնարավոր բարդացումների դեպքում պետք է մտածել Հայաստանի դիրքորոշման մասին, սակայն առայժմ նման խնդիր չի տեսնում:
