«Մենք զբոսաշրջությունը դիտարկում ենք որպես Լեռնային Ղարաբաղի տնտեսության զարգացման գերակա ճյուղերից մեկը,և այդ ուղղությամբ տանում ենք բազմազան և բազմապիսի աշխատանքներ»,-«Առաջին լրատվական»-ի հետ զրույցում ասաց ԼՂՀ զբոսաշրջության և պատմական միջավայրի պահպանության վարչության պետ Սերգեյ Շահվերդյանը: Նրա խոսքերով՝ վերջին շրջանում զբոսաշրջության զարգացման ծրագրերը Ղարաբաղում սկսել են արդյունավետ իրականացվել, մշակվում են զբոսաշրջության երթուղիներ: ԼՂՀ այցելած զբոսաշրջիկն էլ ամենամեծ տպավորությունը ստանում է այնտեղ ապրող մարդկանցից:
Զբոսաշրջիկների թիվն ավելացնելու նպատակով, Շահվերդյանի խոսքերով, ԼՂՀ-ն լայնածավալ քարոզչականաշխատանք է տանում թիրախային տարբեր շուկաներում: «Այդ քարոզչության արդյունքում մենք Ղարաբաղում արձանագրեցինք զբոսաշրջիկների աննախադեպ աճ՝ մոտավորապես 40 տոկոսի չափով, ինչը շատ հուսադրող է, որ մի քանի տարի հետո ԼՂՀ-ն կդառնա զբսաշրջության համար ամենաբարենպաստ տարածքներից մեկը»,-հավելեց Շահվերդյանը:
Նրա խոսքերով, երբ խոսում են զբոսաշրջությունից, իրենք նկատի ունեն միայն օտարերկրյա զբոսաշրջիկներին,և նրանց մեջ չեն մտնում ՀՀ քաղաքացիները: «Բայց շատ կարևոր է, որ հատկապես վերջին երկու տարիների ընթացքում ՀՀ-ից զբոսաշրջիկների մեծ հոսք ենք նկատում Ղարաբաղ: Դա ոչ միայն կարևոր է զբոսաշրջության տեսանկյունից, այլև իր մեջ պարունակում է ազգային գաղափարախոսություն, որ ՀՀ մեր քաղաքացիները Լեռնային Ղարաբաղը ընկալում են որպես Հայաստանի մի մասը»,-ասաց Շահվերդյանը:
Մեր զրուցակիցն անդրադարձավ նաև ԼՂՀ-ում արդեն երկրորդ տարին թողարկվող և վաճառվող վիճակախաղի տոմսերին, որոնք, նրա խոսքով,ոչ միայն զբոսաշրջությանն են նպաստում, այլև ուղղված են վերաբնակեցմանը: «Բացի դրանից, որ իրականացվում են բուն վերաբնակեցման ծրագրեր, վիճակախաղը նպաստել է նաև երկրի տնտեսական հզորացմանը և նոր աշխատատեղեր են ստեղծվել: Այն նաև ԼՂՀ-ում զբոսաշրջության քարոզչության յուրահատուկ ձև է»:
Շահվերդյանից հետաքրքրվեցինք նաև, թե ինչպիսին է իր դիրքորոշումը վերջին օրերին քննարկվող հարցի շուրջ՝ Հայաստանը ՄՄ-ին անդամակցելու է ԼՂՀ-ի՞ հետ, թե՞ առանց: «Վստահ եմ, որ ԼՂՀ-ն և Հայաստանի Հանրապետությունը միասնական դաշտի մեջ են գտնվում,և մեր բոլոր քայլերն այդ ուղղությամբ բխել և բխելու են այդ իրականության խոր գիտակցումից»,-ասաց մեր զրուցակիցը:
