Բնապահպանության նախկին նախարար, այժմ Կոտայքի մարզպետ Արամ Հարությունյանը ներողություն է խնդրել բնապահպան ակտիվիստներից` ավելի քան 2 ամիս առաջ նրանց վիրավորելու համար:
Արամ Հարությունյանն այսօր հայտարարություն է տարածել, որում մասնավորապես ասված է. «Երկխոսության կառուցման ու քաղաքակիրթ բանավեճի ծավալման մշակույթի ու փորձի պակասը, ցավոք սրտի, հանգեցրեց մի իրավիճակի, որի արդյունքում հնչեցին անհիմն մեղադրանքներ և կոշտ արձագանքներ: Կարծում եմ, որ կողմերը փոխադարձաբար պետք է հայցեն միմյանց ներողամտությունը, ինչը ես անում եմ՝ կրկին անգամ նշելով, որ ոչ մեկի վիրավորելու մտադրություն չեմ ունեցել, պարզապես փորձել եմ զսպել որոշ անձանց ոչ պատշաճ վարքագծի դրսևորումները»:
Ես դրական եմ վերաբերվում Բարձրաստիճան պաշտոնատար անձանց էթիկայի հանձնաժողովի որոշմանը և գնահատականին՝ նկատի ունենալով, որ վերջապես սահմանվեց և դրվեց այն նշաձողը, որը վերաբերում է քաղաքացիների հետ շփվելիս քաղաքական գործիչների, կառավարության անդամների, պաշտոնատար անձանց հանրային վարքագծին:
Դրանով դուրս բերվեցին այն չափանիշները, որոնցով այսուհետ պետք է գնահատվի հանրային ծառայողի, պետական պաշտոնյայի վերաբերմունքը և դրա հարգալից լինելը:
Կարծում եմ՝ այս որոշումը կարևոր է նաև նրանով, որ ընդգծվեց պաշտոնատար անձանց անձնական կյանքի նկատմամբ հարգանքի իրավունքի պաշտպանության անհրաժեշտությունը, ինչը հանրային ծառայողների և պաշտոնատար անձանց հետ հարաբերվելու որոշակի վարքագծային կանոններ է թելադրում նաև հասարակության անդամներին»:
Հիշեցնենք, որ ս.թ. մարտի 25-26-ին Երևանում անցկացվող «Պատասխանատու հանքարդյունաբերություն. մարտահրավերներ և հնարավորություններ» թեմայով միջազգային կոնֆերանսի ընթացքում տեղի էր ունեցել միջադեպ՝ բնապահպան ակտիվիստների և այդ ժամանակ բնապահպանության նախարարի պաշտոնը զբաղեցնող Արամ Հարությունյանի միջև:
Հայաստանում իրականացվող հանքարդյունաբերությունն «անպատասխանատու» որակելով՝ բնապահպան ակտիվիստները միջոցառման դահլիճում կազմակերպել էին բողոքի ակցիա, որի ժամանակ նախարարի հասցեին մեղադրանքներ էին հնչեցրել՝ բնական պաշարների անխնա թալանի, հանքարդյունաբերության աղետալի հետևանքների սքողման վերաբերյալ:
Ի պատասխան՝ նախարարը սպառնացել էր ակցիայի մասնակիցներից մեկին՝ ասելով. «Չափդ ճանաչի, ականջներդ կպոկեմ, կտամ ձեռքդ, լակոտ»:
