«Հրապարակ»-ը գրում է. «Սահմանին և առհասարակ բանակում զոհերի մասին գույժը վերջին շրջանում լրահոսում հայտնվում է պատերազմական շրջանին բնորոշ հաճախականությամբ: Եվ եթե այն հանրության շրջանում տագնապ է ստեղծում և պատերազմը վերսկսվելու անհանգստություն, վախ, ապա պաշտպանության համակարգի պատասխանատուներին ու իշխանություններին ընդամենը ստիպում է հակառակորդին ուղղված հայտարարություն-ակնարկներ անել մեր բանակի մարտունակության մասին:
Նախօրեին հայ-ադրբեջանական սահմանագոտու Երասխի հատվածում՝ Նախիջևանի հետ սահմանին Անդրանիկ Եղոյանի և Բորիս Գասպարյանի զոհվելու գույժն ահաբեկել էր մարդկանց, իսկ իշխանություններին հերթական անգամ շանս ընձեռել հակառակորդի ուղղությամբ ճոռոմաբանելու, մինչդեռ խնդրի այս ընթացքը, ըստ վերլուծաբանների, իշխանությունների արտաքին դիվանագիտական ձախողումների հետևանքն է: Ադրբեջանական կողմի ոտնձգությունը զուգադիպեց ԵԱՀԿ գործող նախագահի անձնական ներկայացուցիչ, դեսպան Անջեյ Կասպրչիկի Հայաստանում գտնվելու հետ: Երեկ Սեյրան Օհանյանը հանդիպել էր դեսպանին ու հորդորել իր լիազորությունների շրջանակներում գործուն քայլեր ձեռնարկել շփման գծում իրավիճակը լիցքաթափելու ուղղությամբ, քանի որ «իրավիճակի ընթացիկ սրումը հղի է ադրբեջանական կողմի համար ծանր հետևանքներ ունենալու հավանականությամբ»: Դեսպան Կասպրչիկն էլ հայտնել է իր մտահոգությունը և խոստացել քայլեր ձեռնարկել իրավիճակի լիցքաթափման ուղղությամբ: Մինչ Կասպրչիկը քայլեր կձեռնարկի, վերլուծաբաններն ու երկրի պաշտպանության համար կռիվ տված ազատամարտիկները վերլուծում են իրավիճակը:
«Պատճառն այն է, որ իշխանությունները չկարողացան կազմակերպել այնպիսի պատնեշ անվտանգության համար, որ հակառակո8դը չկարողանար ոտնձգություններ անել, մենք պարտավոր էինք առաջին հերթին սա ապահովել, ոչ թե 20 հարկանի սեփական դղյակներ սարքել: Սա բացթողումներց մեկն է, որի առջև կանգնած ենք»,-ասում է ազատամարտիկ, «Արաբո» ջոկատի հրամանատար Մանվել Եղիազարյանը, նշելով, որ պատնեշ ասելով՝ նկատի ունի և ֆիզիկական, և հոգեբանական իմաստով: Ըստ նրա, պետք է ուժեղ լիներ նաև ժողովրդի բարոյահոգեբանական վիճակը, որ զոհերի մասին լուրերը համընդհանուր տագնապի տեղիք չտային ու մարդկանց այդպես չահաբեկեին, մարդիկ պատրաստ լինեին ցանկացած պահի հանուն պետության պաշտպանության համախմբվել, ոչ թե փախչելու ելքեր փնտրել: Երևանին այդքան մոտ սահմանագծից հնչող կրակոցների մասով ասաց, որ դա վկայում է Ադրբեջանին Թուրքիայի անթաքույց աջակցության մասին:
Ո՞րն է ՀՀ իշխանությունների անելիքը, որ զոհեր չտանք հրադադարի պայմաններում, կամ այս թնջուկի լուծման ուղղությամբ քայլեր ձեռնարկվեն: «Առաջին հերթին այս մարդիկ չպիտի ղեկավարեն երկիրը, պետք է հայրենասերներ լինեն, ազնիվ, եթե այսպես լինի, հավատացե՛ք, հայ ժողովուրդը կարճ ժամանակամիջոցում կհամախմբվի, կվստահի իշխանությանը, և լուծում կգտնեն: Պետք է լինի այնպես, որ ՀՀ քաղաքացին իրեն զգա այս երկրի տերը, զգա պաշտպանված և պատրաստ լինի իր երեխաների հետ այս երկրի պաշտպանությանը լծվելուն»:
Ամբողջությամբ՝ թերթի այսօրվա համարում
