Լիբիան շուրջ 30 միլիարդ դոլար է կորցրել նավթահանքերում և արտահանման տերմինալներում ավելը քան 10 ամիս շարունակվող ցույցերի պատճառով: Այս մասին Reuters գործակալությանը հայտնել է Լիբիայի Կենտրոնական բանկի պահուստային ստորաբաժանման ղեկավար Մուսբահ Ալքարին:
Լիբիացի ապստամբները, որոնք հրաժարվում են զենքերը վայր դնել և ենթարկվել Տրիպոլիի կենտրոնական իշխանություններին, իրենց վերահսկողության տակ են պահում մի շարք կարևոր նավթային նավահանգիստներ: Նրանք պահանջում են երկրի արևելյան շրջաններն առանձնացնել անկախ պետության մեջ և հայտարարում, որ պատրաստվում են ինքնուրույն նավթ արտահանել:
«Ավելի քան 10 ամսվա ընթացքում պետությանը հասցված վնասը կազմում է առնվազն 30 միլիարդ դոլար»,- հայտարարել է Ալքարին՝ հավելելով, որ Լիբիան ունի բավարար չափով արժութային պահուստ՝ կայունությունը պահելու համար: Այս պահին երկրի արժութային պահուստի չափը գնահատվում է 110 միլիարդ դոլար:
«Պահուստը կբավականացնի երեքուկես տարի, ակայն մենք ցանկանում ենք գտնել խնդրի խելամիտ լուծում»,- ասել է Ալքարին:
