Էներգետիկայի և բնական պաշարների նախարարի տեղակալ Արեգ Գալստյանը խորհրդարանում լրագրողների հետ ճեպազրույցում անդրադարձավ էլեկտրաէներգիայի սակագնի թանկացմանը: Լրագրողները նրան հիշեցրին, որ որոշ ժամանակ առաջ հերքել էր սակագնի բարձրացման մասին լուրերը: «Ես չեմ հերքել, ընդամենը պատասխանել եմ հարցին՝ մեր մոտ տենց քննարկումներ կան, թե չէ: Ես ասել եմ, որ մեր մոտ նման քննարկումներ չկան: Առաջին հերթին՝ բաշխիչ ցանցը դիմել էր հանձնաժողով՝ իր ֆինանսական վիճակի վերաբերյալ, առաջարկությամբ՝ որպեսզի վիճակը լավացվի, պետք է վերանայվի իր սակագնային մարժան, մնացածը կայքում տեղադրված է: Ճիշտ թիվը չեմ ասի, շուրջ չորս դրամի մասին է խոսքը»,- ասաց նա:
Գալստյանի խոսքով՝ այստեղ բալանսավորված պետք է լինի լուծումը, թեպետ լավ կլիներ՝ սակագները ոչ թե աճեին, այլ նվազեին . դա լավագույն տարբերակը կլիներ: Փոխնախարարը նշեց, թե այդ սակագների որոշմանը և սպառողների տեսանկյունից է պետք նայել, և շուկայի տեսանկյունից՝ համապատասխան աշխատանքներ են կատարվում, շահագործման ծախսեր, նյութեր, սարքավորումներ են առնում, ամեն ինչն արժեք ունի, ժամանակի ընթացոքւմ ծառայությունների, նյութերի արժեքը նույնպես փոխվում է: «Բայց սպառողի՞ հաշվին»,- լրագրողի դիտարկմանը նա արձագանքեց. «Բա ու՞մ հաշվին»:
Երբ նրան լրագրողներն ասացին, որ պետք է սակագների բարձրացման ժամանակ պետության կողմից փոխհատուցել հավելյալ գումարը, նա նշեց. «Ի՞նչ տարբերություն, եթե բյուջեի հաշվին է, էլի բյուջեն ումն ա, էլի մերն ա, ի՞նչ տարբերություն: Իհարկե, սոցիալական խնդիրներ կան, դրա համար ասում եմ՝ հանձնաժողովը երբ որոշում է ընդունում, բալանսավորված է նայում՝ և սոցիալական հարցերը, և հնարավորությունները, նա հաշվի չի կարող չնստել համակարգում, շուկայում գործող այդ ընկերույունների վիճակի հետ: Աա է վիճակը, երկար տարիներ սակագինը չի վերանայվել, երկար տարիներ չեն ձեռք տվել, անցած տարի պարտադրված էդ բանը արեցինք, հիմա փաստորեն իրավիճակը ստեղծվեց՝ էն, ինչ-որ ստեղծվեց, սա պայմանավորված է ոչ միայն նրանով, ինչ ես ասեցի, այլև էն իրավիճակով, որ ստեղծվեց՝ ռեժիմային հարցեր, ջրի պակասություն, մեզ մոտ միջինացված գնման սակագինը ձևավորվում է տարբեր տեսակի արտադրանքից»,- ասաց նա:
Դիտարկումը, թե խոսքն այստեղ գերշահույթով աշխատող կազմակերպության մասին է՝ հունից հանեց փոխնախարարին: «Որտեղի՞ց եք դուք վերցրել»,- ասաց նա, ապա խորհուրդ տվեց լրջորեն ուսումնասիրել այդ կազմակերպության մասին ներկայացված տվյալները, նոր պնդումներ անել նրա՝ գերշահույթով աշխատելու մասին:
