Նմանտաիպ ցինիզմով, մաղձով, նենգությամբ տոգորված հոդվածները մեկնաբանության կարիք չունեն. այս մասին այսօր ՀՀԿ ԳՄ նիստից հետո լրագրողների հետ զրույցում ասաց ՀՀԿ մամլո խոսնակ Էդուարդ Շարմազանովը՝ ներկայացնելով հարցերի շրջանակը, որոնք քննարկվել են ՀՀԿ ԳՄ նիստի ընթացքում:
Նա նշեց, որ քննարկվել են ներկուսակցական հարցեր: Անդրադառնալով Լևոն Տեր-Պետրոսյանի հոդվածին՝ ասաց, որ այն հոդվածը, որտեղ հեղինակը ժպտում է, մեկնաբանելու կարիք չունի, նմանատիպ ցինիզմով, մաղձով, նենգությամբ տոգորված հոդվածները մեկնաբանության կարիք չունեն: «Հարգարժան լրատվամիջոցը նման հոդվածի կողքին երջանիկ ժպիտ է դնում: Չեմ մեկնաբանում»,- ասաց Շարմազանովը:
Անդրադառնալով ՀՀ-ի ու Ղարաբաղի միջև մաքսակետի տեղակայման հարցին՝ նա ասաց, որ ՀՀ նախագահն ասել է, թե ՀՀ-ն ու ԼՂ-ն համարվում են մեկ միասնական տնտեսական գոտի, և համոզված կարելի է լինել, որ ՀՀ անդամակցությունը ՄՄ-ին և ԵՏՄ-ին կլինի ի շահ ԼՂ-ի: «ԼՂ-ն անկախ հանրապետություն է՝ իր բոլոր ինստիտուտներով, նախագահով, խորհրդարանով։ ՀՀ-ի՝ որպես ԼՂ անվտանգության երաշխավորի խնդիրն է հասնել ԼՂ միջազգային ճանաչմանը, և այդ բանակցությունները գնում են, ինքնորոշման իրավունքի իրացման խնդիր է »,- մեկնաբանեց ՀՀԿ խոսնակը:
Շարմազանովը խոսեց նաև սահմանային միջադեպերից: Նա նշեց, որ եղել է ցավալի դեպք, վանդալիստական գործողություն ԵԱՀԿ նախագահի ՀՀ կատարած այցից հետո: «Դա ցույց է տալիս Ադրբեջանի իրական դեմքը, ցույց է տալիս, որ մենք, ցանկանալով խաղաղություն, պետք է պատրաստ լինենք պատերազմի: Պետության մակարդակով հայատյացություն է քարոզվում. այստեղ անելիք ունեն բոլոր երկրները»,- նշեց Շարմազանովը:
Առաջարկում ենք մանրամասներին քիչ անց ծանոթանալ տեսանյութի միջոցով:
