ԱՄՆ-ը ժամանակավորապես Եվրոպա է ուղարկել երեք B-52 ռազմավարական ռմբակոծիչներ՝ միջուկային մարտագլխիկներ կրելու հնարավորությամբ: Այս մասին հայտնել է ԱՄՆ զինված ուժերի ռազմավարական հրամանատարության մամլո ծառայությունը՝ փոխանցում է ITAR-TASS-ը:
Օդանավերը տեղակայվել են բրիտանական Գլոսթերշիր կոմսության «Ֆեյրբորդ» բազայում: Դրանք այնտեղ կգտնվեն մոտ երկու շաբաթ: Այդ ընթացքում ռազմավարական ռմբակոծիչներն ուսումնամարզական թռիչքներ կանցկացնեն ԱՄՆ զինված ուժերի եվրոպական հրամանատարության օպերատիվ պատասխանատվության դաշտում: Ծրագրվում է, որ ռմբակոծիչների անձնակազմերը կծանոթանան տարածաշրջանի բազաներին և այնտեղ անցկացվող օպերացիաներին՝ հայտնել են մամլո ծառայությունում:
Բացի այդ, ռմբակոծիչներից մեկը հունիսի 7-ին կմասնակցի Նորմանդիայում դաշնակիցների վայրէջքի 70-ամյակին նվիրված տոնակատարություններին:
Նշվում է, որ ռմբակոծիչները սպառազինություն չեն կրում:
