Սիրիայի ղեկավարությունը շնորհակալություն է հայտնել քաղաքացիներին նախագահական ընտրություններում ակտիվ մասնակցության համար: Երկրի նախագահի գրասենյակի տարածած հաղորդագրության մեջ նշվում է, որ «Սիրիան և իր ժողովուրդը մուտք են գործում փառավոր պատմության նոր փուլ»:
«Սիրիացիներն ապացուցեցին իրենց հավատարմությունը հայրենիքին և կենարար մշակույթին: Չնայած բոլոր մարտահրավերներին և ահաբեկչության սպառնալիքին՝ նրանք ցանկություն հայտնեցին ակտիվ մասնակցել իրենց ապագայի ստեղծման գործընթացին»,- ասվում է փաստաթղթում:
Սիրիական «Ալ-Վատան» թերթի տվյալներով՝ Սիրիայի որոշ շրջաններում ընտրությունների մասնակցությունը կազմել է ավելի քան 70 տոկոս:
Ընտրությունների ակնհայտ ֆավորիտը Բաշար Ասադն է: Թերթը գրում է, որ որոշ ընտրողներ իրենց քվեաթերթիկը գցելիս «երդում էին տալիս առաջնորդին»:
