Հայաստանի ատոմակայանի փակման պահանջով թղթերը Ադրբեջանի կողմից համառորեն տարվում են, մտցվում Եվրոպական կառույցներ: Հունիսի 4-ին ԱԺ տնտեսական հարցերով մշտական հանձնաժողովի նիստում «Խաղաղ նպատակներով ատոմային էներգիայի անվտանգ օգտագործման մասին» ՀՀ օրենքում լրացում և փոփոխություն կատարելու մասին Կառավարության հեղինակած նախագծի քննարկման ժամանակ այս մասին նշեց ՀԱԿ խմբակցության պատգամավոր Հրանտ Բագրատյանը: «Ես մեկ – մեկ նույնիսկ վախենում եմ, որ էս Եվրազեսն էլ դեմ լինի սրան: Ինչի՞ օրինակ պարբերաբար հայտարարություններով չեք պատասխանում: Մենք չենք կարողանում Եվրամիությունում, Եվրանեսթում պայքարել էդ ալիքի, էդ թափի դեմ: Արդեն ընդունված բան ա, որ իբր Հայաստանում խուլիգան ատոմակայան կա, որը Չեռնոբիլի տիպի ա»,- ասաց նա:
Նիստը վարող ԲՀԿ-ական պատգամավոր Միքայել Մելքումյանը հնչած հարցադրմանն ավելացրեց` ինչու Հայաստանն ակտիվ չէ միջազգային կառույցների հետ այս ոլորտում ինտեգրացիոն գործընթացներում: «Դուք գիտեք` Ադրբեջանը պատրաստվում ա քսան միլիարդ դոլար ներդրում անի Ադրբեջանում նոր ատոմակայան կառուցելու համար: Չե՞ք կարծում, որ մենք էս էներգետիկ միջազգային գործընթացներից դուրս ենք մնում, չենք կարողանում ինտեգրվել լուրջ ծրագրերի կամ ոչ արդյունավետ ենք ինտեգրվում»,- հետաքրքրվեց նա:
Հիմնական զեկուցող, ՀՀ ԿԱ միջուկային անվտանգության կարգավորման պետկան կոմիտեի նախագահ Աշոտ Մանուչարյանը պատասխանեց, որ դա էներգետիկայի նախարարության իրավասությունն է, իսկ իրենք միայն անվտանգությամ ենք զբաղվում: «Մենք վաղուց ենք համագործակցում մասնագիտացված միջազգային կազմակերպությունների, այդ թվում` ՄԱԳԱՏԷ-ի, ինչպես նաև ԱՄՆ, ՌԴ, բոլոր երկրների հետ, որոնք ունեն ատոմակայաններ: Ոչ մի կազմակերպությունում Ադրբեջանը կամ Թուրքիան հարց չեն բարձրացնում, որ պետք է Ատոմակայանը փակվի: Մի փոքր ելույթ ունեցան Ադրբեջանի ներկայացուցիչները, որ Հայաստանի թափոնները տանում են, Ղարաբաղում են թափում, բայց ՄԱԳԱՏԷ-ից անմիջապես տնօրենի մակարդակով արձագանքեցին, որ նրանք հիմարություն են ասում, բոլորը գտնվում են ՄԱԳԱՏԷ-ի հսկողության տակ, և նման բան չի կարող լինել»,- ասաց նա` հավելելով, որ ոչ ՄԱԳԱՏԷ-ում, ոչ ԵՄ-ում այդ խնդիրը նրանք չեն բարձրացրել. նման հարցեր միայն ԶԼՄ-ներում են բարձրացնում:
«ԵՄ-ում` կարևորագույն կառույցներից մեկում, անձամբ ես եմ պայքարել: Դուք ասում եք` չէ, ես էլ ասում եմ, որ տենց չի», – արձագանքեց Բագրատյանը: Տեսակետին, թե իրականում հին է մեր ատոմակայանը, և ինչքան էլ անվտանգությունն ապահովեն, մետաղը չեն կարող փոխել, Բագրատյանը պատասխանեց. «Ես դա շատ լավ հասկանում եմ, մետաղը կարող է հոգնել և այլն, բայց համենայն դեպս, ատոմակայանը չի համարվում վտանգավոր, սակայն ես տեսնում եմ վտանգ Հայաստանին զրկել ատոմային էներգետիկայից»:
