Ամերիկյան Միչիգան նահանգի սենատը հավանություն է տվել սնանկացած Դեթրոյթ քաղաքի ֆինանսական օգնության ծրագրին: Օրենսդիրների մեծ մասը կողմ է քվեարկել քննարկված բոլոր 9 օրինագծերին, համաձայն որոնց՝ նահանգի բյուջեից Դեթրոյթի աջակցման համար կհատկացվի 194.8 մլն դոլար: Այս մասին հայտնում է ITAR-TASS-ը:
Ծրագրվում է, որ այդ միջոցները, մասնավորապես, կուղղվեն թոշակների վճարմանը: Տարեսկզբին Դեթրոյթի կենսաթոշակային հիմնադրամի դեֆիցիտը կազմել է 3.5 մլրդ դոլար: Ավելի վաղ դատարանը վճռել էր, որ քաղաքի իշխանություններն ունեն կենսաթոշակային վճարները կրճատելու իրավունք՝ համապատասխան պարտքի վերակառուցման ծրագրի:
Նահանգի բյուջեի միջոցների մի մասը կուղղվի Դեթրոյթին պատկանող արվեստի գործերի հավաքածուի փրկությանը: Քաղաքի պարտքը կազմում է 18 մլրդ դոլար: Christie’s աճուրդի տան գնահատականներով՝ նրա հավաքածուն արժե 450-870 մլն դոլար:
Հավանության արժանացած օրինագծերը նաև նախատեսում են նահանգի մակարդակով վերահսկիչ մարմնի ստեղծում, որն առնվազն 13 տարի կհետևի քաղաքի եկամուտներին ու բյուջեին, ինչպես նաև կնքված պայմանագրերին: Դրանք պարտավորեցնում են քաղաքի ղեկավարությանը նշանակել քաղաքի գլխավոր ֆինանսական տեսուչ և ներկայացնել քառամյա ֆինանսական ծրագիր:
Ընկերություններն ու մասնավոր անձինք արդեն որպես բարեգործական օգնություն հավաքել են 366 մլն դոլար:
