Աֆղանստանում ՆԱՏՕ-ի նոր առաքելությունը՝ «Վճռական աջակցությունը», որը հյուսիսատլանտյան դաշինքը կսկսի իրագործել 2014 թվականից հետո, կսահմանափակվի ժամկետներով: Այս մասին հայտնել է ՆԱՏՕ-ի պաշտոնական ներկայացուցիչ Օանա Լունգեսկուն՝ փոխանցում է ITAR-TASS-ը:
««Վճռական աջակցությունը» երբեք չի դիտարկվել որպես երկարաժամկետ առաքելություն: Այն լրացնում է աֆղանական անվտանգության ուժերի աջակցման այն առաքելությունը, որն արդեն անցկացվում է, և որի գործունեության արդյունքում դրանց ընդհանուր թվաքանակը հասել է 350 հազար զինվորի և ոստիկանի»,- լրագրողներին Բրյուսելում ասել է նա:
Լունգեսկուն հայտնել է, որ դաշինքի և Քաբուլի միջև ուժերի կարգավիճակի մասին համաձայնության ստորագրման բանակցությունները «լավ են ընթացել»: «Վճռական աջակցություն» առաքելության նպատակն Աֆղանստանի անվտանգության ուժերի պատրաստությունն է և օգնության ցուցաբերումը՝ առանց ռազմական օպերացիաների:
Արևմտյան ԶԼՄ-ների տվյալներով՝ ՆԱՏՕ-ն մտադիր է Աֆղանստանում թողնել մինչև 12 հազար զինվորական:
