Ռուսաստանը մտադիր է երկուշաբթի օրը ՄԱԿ-ի Անվտանգության խորհուրդ մտցնել Ուկրաինայի մասին բանաձևի նախագիծ, որում կներառվեն բռնության անհապաղ դադարեցման պահանջներ և հումանիտար միջանցքների ստեղծում, Մավրիտանիայից գործընկեր Ահմեդ ուլդ Թեգեդիի հետ բանակցություններից հետո հայտնել է Ռուսաստանի արտաքին գործերի նախարար Սերգեյ Լավրովը, հայտնում է ITAR-TASS-ը:
«Փաստաթղթերի (Ժնևի հայտարարության և ԵԱՀԿ «ճանապարհային քարտեզի») իրագործմանը հասնելու նպատակով, իսկ դրանք սկսվում են բռնության դադարեցման պահանջով, Ռուսաստանը ծրագրում է ՄԱԿ-ի Անվտանգության խորհուրդ մտցնել բանաձևի նախագիծ»,- նշել է նախարարը:
Նրա խոսքով՝ «դրանում կներառվեն բռնության անհապաղ դադարեցման և կրակի կայուն և հուսալի դադարեցման նպատակով փաստացի բանակցություններ սկսելու պահանջներ»:
Միևնույն ժամանակ, Լավրովն ասել է. «Մեր արևմտյան գործընկերները երկար ժամանակ մեզ համոզում էին, որ հենց որ տեղի ունենան ընտրությունները, ամեն ինչ կհանգստանա, այնինչ ճիշտ հակառակն է տեղի ունենում»:
