Երեխաների պաշտպանության միջազգային օրվան ընդառաջ Հայաստանի Հանրապետության արդարադատության նախարարության դատական ակտերի հարկադիր կատարման ծառայությունում մայիսի 31-ին կազմակերպվեց արդեն ավանդույթ դարձած միջոցառում: Վերջինին մասնակցեցին 3-12 տարեկան 200 երեխա, որոնց ալիմենտի բռնագանձման և ծնողների հետ տեսակցությունների կազմակերպման հարցերով զբաղվում է ծառայությունը: Երեխաների համար կազմակերպած տոնական շոու ծրագիրը` ծաղրածուի և հեքիաթների հերոսների մասնակցությամբ, փոքրիկների օրը վերածեց իրական տոնի՝ հնարավորություն տալով նաև իրենց նկարազարդումներով զարդարել ԴԱՀԿ ծառայության շենքի բակը:
ՀՀ գլխավոր հարկադիր կատարող, գեներալ-մայոր Միհրան Պողոսյանը շնորհավորեց փոքրիկներին տոնի կապակցությամբ՝ մաղթելով նրանց անհոգ մանկություն, առողջություն և լուսավոր ապագա:
«Մեր երեխաները մշտապես պետք է լինեն ամենաերջանիկն ու ամենապաշտպանվածը: Շատ եմ ցանկանում, որ դուք ուրախ լինեք, լավ սովորեք ու դառնաք մեր հայրենիքի արժանի զավակը»,- ասաց ՀՀ գլխավոր հարկադիր կատարողը:
Նրա խոսքով՝ փոքրիկները ԴԱՀԿ ծառայության ամենանուրբ կետերից են, որոնց հետ աշխատելու համար հարկադիր կատարողն առաջին հերթին պետք է նաև լավ հոգեբան լինի: «Այդ իսկ պատճառով մենք մեր նոր աշխատակիցների ուշադրությունը սևեռում ենք հատկապես այդ հարցի վրա: Մենք այսօր գործ ունենք ավելի քան 2500 երեխաների հետ: Ցավոք, վերջին տարիներին այս թիվն ավելանում է»,- հավելեց Միհրան Պողոսյանը:
Մանկավարժ Սուսաննա Բեյբությանը, ով միջոցառմանը մասնակցում էր թոռնիկի` 7-ամյա Վրեժի հետ, շնորհակալություն հայտնեց ԴԱՀԿ ծառայությանը՝ երեխաների թիկունքին ամուր կանգնած լինելու և փոքրիկների իրավունքները մշտապես պաշտպանելու համար:
«Թող այսպիսի հաստատությունները, որոնք թիկունք են կանգնում այսպիսի երեխաներին, ավելի շատ լինեն, որպեսզի մանուկներն էլ հասկանան, որ պարտք ու պատիվ ունեն հայրենիքի և նրանց հանդեպ, ովքեր միշտ հոգատար են եղել իրենց նկատմամբ»,- ասաց մանկավարժը:
ԴԱՀԿ ծառայության կողմից երեխաները նաև նվերներ ստացան՝ գրքերի, նկարչական պարագաների և խաղալիքների տեսքով:
Հունիսի 1-ը երեխաների պաշտպանության միջազգային օրն է, որն ազդակ է բոլոր մարդկանց և, հատկապես, ծնողներին, որ երեխաները հասարակության խոցելի խմբերից են և պահանջ ունեն ամենօրյա ուշադրության, սիրո և պաշտպանության:
