Վերաքննիչ քրեական դատարանում այսօր սկսվեց Հարսնաքարի գործով վերաքննիչ բողոքի քննությունը, որին տուժող կողմը չէր ներկայացել զբաղվածության պատճառով:
Դատական նիստը մեկնարկեց դատարանի առջև բողոքի ակցիայով: Ամբաստանյալների հարազատները, ովքեր արդեն մեկ շաբաթ է՝ քաղաքի տարբեր վայրերում ակցիաներ են անցկացնում, վերաքննիչ դատարանից պահանջում էին արդարացի դատավճիռ կայացնել՝ բեկանել առաջին ատյանի որոշումը և մեղադրյալներին դատել ըստ իրենց արածի և «ոչ թե բոլորին համատեղ՝ իրենց չարածի համար դատապարտել 12 տարվա ազատազրկման»:
«Դատավոր Դավիթ Հարությունյանը վախեցավ ցուցարարներից, բարձրացված աղմուկից և կայացրեց դատավճիռ, սակայն իմ տղան մեղավոր չէր: Բայց ո՞նց կարելի էր նման վճիռ կայացնել»,- բողոքում էին ամբաստանյալների հարազատները:
Ամբաստանյալ Գարիկ Մարգարյանի պաշտպան Մարինե Թովմասյանն այսօր դատարանում հայտարարեց, թե ինքը մինչ օրս էլ չի հասկանում, թե դատարանն ինչ է ցանկացել ասել մեղադրական դատավճռով: «Մի դեպքում՝ մատնանշել է ամբողջ դատաքննության ընթացքում հակասական, իրար չհամապատասխանող ցուցմունքներ, մի դեպքում՝ նշել է տուժողի ցուցմունքները, որ նա բողոք չունի, իսկ վերջում նշել է, որ հենց այդ նույն ցուցմունքով մեղադրանքը հիմնավորված է»,- ասաց փաստաբանը` շարունակելով ներկայացնել Առաջին ատյանի դատարանի որոշման մեջ առկա հակասությունները:
12 տարվա ազատազրկման դատապարտված Արման Բաղդասարյանի պաշտպան Միհրան Պողոսյանն էլ վերաքննիչ դատարանից պահանջում է, որ իր պաշտպանյալի մասով կայացված դատավճիռը բեկանվի և կայացվի նոր՝ արդարացման դատավճիռ, քանի որ, փաստաբանի խոսքով, քրեական գործի քննության ընթացքում նրա մեղքը ապացուցող որևէ փաստ ի հայտ չի եկել:
Այնուամենայնիվ, վերաքննիչ դատարանում հավաքված ամբաստանյալների հարազատները նշեցին, որ դատարանից առանձնապես ակնկալիքներ չունեն: «Նման անարդարություն չի եղել, որ մենք տեսանք առաջին ատյանում: Չենք հավատում, որ վերաքննիչը իր կոլեգային դեմ կգնա և կփոփոխի դատավճիռը: Մենք առանձնապես հույս չունենք»,- ասացին նրանք:
