Ավարտվեց է Նորագավիթի սուսերամարտի մանկապատանեկան մարզադպրոցում մայիսի 27-ին մեկնարկած ՀՀ գավաթի խաղարկությունը, որին մասնակցում էին 100-ից ավելի մարզիկներ՝ Երևանից, Գյումրիից, Վանաձորից և Բյուրեղավանից: Առաջնության առաջին օրը՝ մայիսի 27-ին, կայացան խոցասուսերակիր կանանց և տղամարդկանց մրցումները:
Կանանց մրցապայքարում 12 մասնակիցներից հաղթող ճանաչվեց միջազգային մրցաշարերի հաղթող Էմմա Պողոսովան, 2-րդ տեղը գրավեց Լիլիթ Էվոյանը, իսկ 3-րդ տեղերը՝ ԱննաԱվետիսյանն ու Սվետլանա Նազարյանը:
Տղամարդկանց մրցապայքարում 24 ուժաղագույններից հաղթող դարձավ Արամայիս Գաբոյանը, 2-րդ տեղը գրավեց Միքայել Ղազարյանը, իսկ 3-րդ տեղերը՝ Արկադի Մուրադյանն ու Վարդան Ռուբենյանը:
Մայիսի 28-ին մրցասպարեզում ճկասուսերակիրներն էին, որոնցից հաղթող դարձավ Էմիլ Դանիելյանը, 2-րդ հորիզոնականը զբաղեցրեց Մայքլ Հովհաննիսյանը, իսկ 3-րդ տեղերում Միհրան Ղազարյանն ու Պարգև Ստեփանյանն էին: Երեկ՝ առաջնության վերջին օրը, մրցելույթներով հանդես եկան ճկասուսերակիր կանայք և թրասուսերակիր տղամարդիկ:
Ճկասուսերակիր կանանցից ուժեղագույնը ճանաչվեց Հասմիկ Աղաբաբյանը, 2-րդ տեղը գրավեց Սուսաննա Ղազարյանը, իսկ 3-րդ տեղերը՝ Մարիամ Հարությունյանն ու Արփինե Աթոյանը:
Թրասուսերակիր տղամարդկանցից հաղթող ճանաչվեց Արթուր Կարապետյանը, 2-րդ հորիզոնականում Արեն Անդրեասյանն էր, իսկ 3-րդում՝ Արսեն Զուրաբյանն ու Ռուբեն Սարգսյանը:
Երկու ոսկե և չորս բրոնզե մեդալով թիմային հաշվարկով առաջնության հաղթողդարձավ «Քեթրին» սուսերամարտի ակումբը՝ արժանանալով ՀՀ գավաթին:
