Ադրբեջանում ԱՄՆ դեսպանատունը իր արտակարգ հայտարարության մեջ կրկին քննադատել է Ադրբեջանի կառավարությանը՝ Ընտրությունների մոնիթորինգի և ժողովրդավարության ուսուցման կենտրոնի ղեկավար Անար Մամեդլիի, այդ կենտրոնի գործադիր տնօրեն Բաշիր Սուլեյմանլիի և գործընկեր կազմակերպության ղեկավար Էլնուր Մամեդովի դեմ կայացված դատավճռի կապակցությամբ: Այս մասին հայտնում է Turan-ը:
«Այդ ձերբակալություններն Ադրբեջանի ժողովրդավարական զարգացման լուրջ հետընթաց են: Լինելով Ադրբեջանի հիմնական գործընկերը՝ մենք հավատում ենք, որ երկրի ապագա կայունության և զարգացման համար ամենաճիշտ քայլը բաց հասարակության համար հնարավորություններ ստեղծելն է»,- ասվում է ԱՄՆ դեսպանության հայտարարության մեջ:
Մայիսի 27-ին Բաքվի ծանր հանցագործությունների դատարանը Անար Մամեդլիին դատապարտել է 5.5 տարվա ազատազրկման, Բաշիր Սուլեյմանլիին՝ 3.5, իսկ Էլնուր Մամեդովին՝ նույնքան ժամկետով պայմանական պատժի: Նրանք մեղավոր են ճանաչվել հարկերի վճարումից խուսափելու, ֆինանսական միջոցների յուրացման, պաշտոնեական և ծառայողական լիազորությունները գերազանցելու ու չարաշահելու և պաշտոնեական կեղծիքի մեջ:
