ԵՊՀ իրավաբանական ֆակուլտետի դեկան, սահմանադրական բարեփոխումների հանձնաժողովի անդամ Գագիկ Ղազինյանը դատական անկախության առթիվ «Առաջին լրատվական»-ի հարցին ի պատասխան պնդեց, որ դատավորի աշխատանքին հանրապետության նախագահի առնչությունը չի կարելի բացառել՝ որպես այլ իշխանության ներկայացուցիչ, և որ սահմանադրական փոփոխությունների փաթեթով նման խնդիր չի դրվել:
«Մենք ընդամենը ելնում ենք նպատակից՝ ինչպես անել, որ արդյունավետ գործի այս կամ այն իշխանության թևը, տվյալ դեպքում՝ դատական իշխանությունը»,- ասաց Ղազինյանը: Հարցին՝ արդյոք այս փոփոխություններով դատական համակարգում առկա կաշառքներն ու վերևից զանգով վճիռներ կայացնելու պրակտիկան կվերանա՞ն, Ղազինյանն ասաց, թե ինքը նման փաստերի չի տիրապետում. «Սահմանադրական բարեփոխումները կախարդական փայտիկ չեն, որ հենց արեցինք, բոլոր պրոբլեմները կվերանան: Արվում է, որ հնարավորություն ստեղծվի»: Ավելին՝ Գագիկ Ղազինյանի համոզմամբ՝ «մեր հասարակությունը արդարադատության պահանջատեր չէ»:
Մեր իրականության մեջ ընդունված է, որ պաշտոնյաների երեխաները բավական երիտասարդ տարիքում դատավոր են դառնում: Այս առթիվ մեր հարցին ի պատասխան ԵՊՀ իրավաբանական ֆակուլտետի դեկանը հակադարձեց. «Պաշտոնյայի երեխան կնի՞ք է, որ իրենց չի կարելի ոչ մի բանի հավակնել: Դուք ասեք՝ ոչ արժանի պաշտոնյայի ոչ արժանի զավակը»:
Տեսանյութում՝ ԵՊՀ իրավաբանական ֆակուլտետի դեկան Գագիկ Ղազինյանի հետ «Առաջին լրատվական»-ի հարցազրույցը: