Մարմնի մկանների համեմատ մարդու ուղեղն այնքան մեծ առաջընթաց չի գրանցել էվոլյուցիոն սանդղակով՝ պրիմատների նույն օրգանների և հյուսվածքների համեմատությամբ, ցույց են տալիս նոր հետազոտության արդյունքները, որոնք հրապարակված են PLOS Biology ամսագրում: Միևնույն ժամանակ, մեր մկանները զգալիորեն թուլացել են, և մեր ուժի սահմանագիծը ժամանակի հետ նվազել է:
Նոր աշխատանքի հեղինակներն ուսումնասիրել են մարդու ուղեղի և մարմնի զարգացման ընթացքը: Պարզվել է, որ մարդու ուղեղը 4 անգամ ավելի արագ է զարգացել, քան շիմպանզեի ուղեղը, բայց մարմնի մկաններն 8 անգամ ավելի արագ են էվոլյուցիայի ենթարկվել, քան այլ պրիմատներինը:
«Սա բավական կտրուկ փոփոխություն է ինչպես ուղեղի, այնպես էլ մկանների: Սկզբում մենք ուզում էինք մկաններն օգտագործել որպես ստուգողական ցուցանիշ, որի հետ կարելի է համեմատել ուղեղը, բայց որքան զարմացանք, երբ պարզեցինք, որ դրանք ավելի արագ են զարգացել»,- պատմում է հետազոտության հեղինակ Ֆիլիպ Խայտովիչը Շանհայի կենսաբանական գիտությունների ինստիտուտից:
Հետազոտողների միջազգային թիմը վերլուծել է ավելի քան 10 000 տարատեսակ մետաբոլիտներ 4 տեսակի հյուսվածքներում՝ մարդու, շիմպանզեի, մակակայի և մկան: Մինչդեռ հյուսվածքների մեծ մասը զարգացել է նույն սխեմայով, ինչ գենոմի փոփոխությունները, մկանային հյուսվածքն էվոլյուցիոն այլ ուղիով է ընթացել:
Կենսաբանները փորձով այսպիսի փոփոխությունների վրա ազդող գործոններից բացառել են կենսակերպը:
Ստացվել է, որ չնայած մարդը կապիկից մկանների զարգացման առումով հեռու է գնացել՝ մեր ուժը դրանից չի աճել, ընդհակառակը՝ թուլացել է: Կենսաբաններն ասում են, որ սա այն է, ինչ մենք ստիպված ենք եղել զոհել հանուն գիտակցության զարգացման:
