Դոնեցկի մարզի Սլավյանսկ շրջանում ահաբեկիչներն ուղղաթիռ են խփել: Այս մասին հայտնում է «Նովոստի Դոնբասա»-ն՝ հղում անելով անջատողականների ռադիոալիքին:
Ուկրաինայի Գերագույն Ռադայի խոսնակ Ալեքսանդր Տուրչինովն այս տեղեկությունը հաստատել է խորհրդարանում:
Նա հայտնել է, որ հինգշաբթի օրն ահաբեկիչները ռուսական շարժական զենիթահրթիռային համալիրով ուկրաինական ուղղաթիռ են խփել, որը ռոտացիայի համար զինվորականների էր փոխադրում:
«Մեր 14 զինվորները՝ գեներալ Կուլչիցկու հետ միասին, զոհվել են»,- ասել է Տուրչինովը:
Ռադան մեկ րոպե լռությամբ հարգել է նրանց հիշատակը: Ականատեսների տեղեկությամբ՝ մարտ է ընթանում նաև Կրասնոլիմանսկի շրջադարձին, Անդրեևկա և Չերվոնի Մոլոչար բնակավայրերի մոտ:
Դեպքի վայրից ծուխ է բարձրանում, այնտեղ շարունակվում է ինտենսիվ փոխհրաձգությունը:
Ինչպես «Ուկրաինսկայա պրավդա»-ին հաղորդել է հակաահաբեկչական գործողության մամլո ծառայության ղեկավար Վլադիսլավ Սելեզնյովը, զոհվել է ոչ թե 14, այլ 10 զինվորական:
