Սյունիքի նախկին մարզպետ Սուրիկ Խաչատրյանի առանձնատան մոտ 2013թ. հունիսի 1-ին տեղի ունեցած դեպքերի գործով միակ մեղադրյալ Արտակ Բուդաղյանի մեղադրական եզրակացությունն արդեն հաստատված է: Գործն ուղարկվել է Սյունիքի մարզի ընդհանուր իրավասության դատարան: Մեղադրական եզրակացության մեջ նշված է. «Արտակ Բուդաղյանին մեղադրանք է առաջադրվել այն բանի համար, որ նա, իր եղբայր Ավետիք Բուդաղյանից տեղեկանալով, որ 01.06.2013թ. ժամը 22-ի սահմաններում Սյունիքի նախկին մարզպետ Սուրիկ Խաչատրյանի ավտոմեքենայում իրեն ծեծի են ենթարկել, նպատակ ունենալով վախեցնել Սուրիկ Խաչատրյանին և նրա ընտանիքի անդամներին, նրանց մոտ առաջացնել տագնապի, սեփական անվտանգության համար անհանգստության զգացում, նույն օրը ժամը 23-ի սահմաններում ՎԱԶ 2106 մակնիշի ավտոմեքենայով գնացել է Գորիս քաղաքի Դավիթ-Բեկ փողոցում գտնվող` Սուրիկ Խաչատրյանին պատկանող առանձնատան մոտ, իր հետ նախապես վերցված, իր անվամբ գրանցված որսորդական հրացանը ձեռքին իջնելով ավտոմեքենայից, սպանության սպառնալիքներ է տվել Սուրեն Խաչատրյանի և նրա հարազատների հասցեին»: Գործը քննելու է Սյունիքի մարզի ընդհանուր իրավասության դատարանի դատավոր Նապոլեոն Օհանյանը:
«Առաջին լրատվական»-ի հետ զրույցում Բուդաղյանների պաշտպան Հայկ Ալումյանը նշեց, որ նախապես կարծում էին գործի վարույթը կկարճվի, բայց հետո ստիպված առարկել են, դեմ են եղել գործը կարճելուն, որ գոնե այս ձևով գործը գնա դատարան, որպեսզի իրենք կարողանան դատավարության ժամանակ ցույց տալ, թե ինչ է տեղի ունեցել և հարցաքննել դեպքի մասնակիցներին: Առաջին դատական նիստն Ալումյանը կանխատեսում է հունիսի կեսերից ոչ շուտ:
Նախկին մարզպետի որդու՝ Տիգրան Խաչատրյանի պաշտպան Ռուբեն Սահակյանը վստահ է՝դատարանում միանշանակ կկարողանան ապացուցել, որ Արտակ Բուդաղյանը նման մտադրություն է ունեցել, և դրա համար բավարար է այն, ինչ-որ կա տեսաժապավենում: «Ես ասում եմ` միայն տեսաժապավենը բավարար է, բայց դրան գումարած` կան բազմաթիվ վկաներ, դուք էլ գիտեք բոլոր վկաների անունները: Մյուս կողմը բազմաթիվ անգամ խեղաթյուրել է տվյալները և շարունակելու է խեղաթյուրել ու սխալ ներկայացնել: Ես ասել եմ և ասում եմ, որ Ավետիք Բուդաղյանի մահը Արտակ Բուդաղյանի խղճին է»,- ասաց նա՝ հավելելով, որ նրանք դա շատ լավ գիտակցում են, սակայն չեն ուզում ընդունել, և ինքը՝ փաստաբանը նրանց հասկանում է:
