Իսրայելի Կնեսետում աջ թևի որոշ պատգամավորներ կառավարությանը կոչ են արել երկրին միացնել Հորդանան գետի Արևմտյան ափին կառուցված մոտ 90 հրեական բնակավայր՝ հայտնում է Reuters-ը: Օրենսդիրներից մեկն այսպիսի քայլն անվանել է հատուցում պաղեստինցիների հետ բանակցությունների ձախողման համար:
Ըստ ներկայացված օրինագծի՝ Իսրայելը կմիացնի հրեական անկլավները, որոնք կարող էին մանրադրամ դառնալ պաղեստիցիների հետ խաղաղ բանակցություններում: Այդ բնակավայրերը գտնվում են այսպես կոչված՝ С գոտում, որն ըստ Օսլոյում կնքված համաձայնությունների՝ Իսրայելի լիակատար վերահսկողության տակ է: Այդ տարածքում ապրում է 300 հազար պաղեստինցի և 350 հազար հրեա վերաբնակիչ:
«Հրեական տուն» աջ կուսակցությունից Օրիտ Ստրուկն ասել է, որ այդպիսի միակողմանի գործողությունները հնարավոր են դարձել այն բանից հետո, երբ ՖԱԹՀ-ը և ՀԱՄԱՍ-ը հաշտություն են կնքել: Նրա խոսքով՝ Իսրայելը պետք է միացնի Արևմտյան ափի մեծ մասը, բայց դա պետք է «աստիճանաբար» անի՝ սկսելով այն տարածքներից, որտեղ առավել մեծ թվով իսրայելցիներ են ապրում:
Պաղեստինցիները դեմ են միացմանը՝ համարելով, որ հրեական պետությունն իրենց զրկում է այն հողից, որի վրա ապրել են իրենց շատ սերունդներ: Նույն կարծիքին են արևմտյան երկրների մեծ մասն ու ՄԱԿ-ը՝ 1967 թվականին բռնազավթված հողի վրա կառուցված իսրայելական բնակավայրերը դիտարկելով որպես խոչընդոտ խաղաղ բանակցությունների համար:
