Stuxnet համակարգչային վիրուսը վերադարձել է հայրենիք: Իրանի միջուկային ծրագրերի սաբոտաժի նպատակով ամերիկյան կառավարության պատվերով ստեղծված վտանգավոր վիուրսով վարակվելու մասին այսօր առաջին անգամ հայտարարել են ամերիկյան ընկերությունները:
Stuxnet է հայտնաբերվել երկրի ամենախոշոր նավթային ընկերություններից մեկի՝ Chevron–ի ցանցում: Ընկերության ղեկավարության խոսքերով՝ վիրուսը չի հասցրել վնասել ցանցը. այն ժամանակին հայտնաբերվել և ոչնչացվել է:
Այն փաստը, որ Stuxnet-ը հարձակվել է ամերիկյան ընկերության վրա, խոսում է այն մասին, որ կամ դրա ստեղծողներն այլևս չեն կարողանում այն կառավարել, կամ էլ դիտմամբ են այն տարածում երկրի ներսում:
Մնում է միայն գուշակել, թե էլ որ երկրներում և ինչ ոլորտներ է վարակել Stuxnet-ը: Chevron-ում համոզված են, որ այդպիսի ընկերությունների թիվը փոքր չէ:
Հիշեցնենք, որ Stuxnet-ը հայտնաբերվել էր 2010 թ. ամռանը՝ Իրանի և Մերձավոր Արևելքի երկրների բազմաթիվ համակարգիչներում: Վիրուսի ուսումնասիրությունը ցույց է տվել, որ բացի լրտեսական հատկություններից, այն հնարավորություն է տալիս խոչընդոտել ուրանի հարստացման աշխատանքներին:
Վիրուսն ամենաշատ տարածված էր Իրանում, մասնավորապես այն մարդկանց համակարգիչներում, ովքեր առնչություն ունեն միջուկային ծրագրերի հետ: Այնպես որ նրա նշանակությունն ինքնին պարզ է դառնում: Ծրագրի բարդությունը խոսում է այն մասին, որ վիրուսը ստեղծվել է խոշոր պետության հովանու ներքո աշխատող մասնագետների կողմից։