Գորիսում քաղաքապետի ընտրություններն ավարտված չեն, հունիսի ութին դրանք կայանալու են: Մայիսի 27-ին լրագրողների հետ ճեպազրույցում այս մասին նշեց Սյունիքի մարզպետ Վահե Հակոբյանը: «Երկու թեկնածու կա, երկուսն էլ ինքնաբացարկ են հայտնել: Այդ օրը Գորիսի ազգաբնակչությունն իր քվեն տալու է»,- ասաց նա: Լրագրողները հետաքրքրվեցին՝ Սյունիքի նախկին մարզպետ Սուրիկ Խաչատրյանն ի՞նչ հիմքով էր պնդում, որ ընտրություններն արդեն ավարտված են: «Իրենից հարցրեք, ես ի՞նչ կարող եմ ասել: Ինքն ասել է, ինձնի՞ց եք հարցնում»,- ասաց նա:
Հակոբյանը բացառեց թեկնածուների վրա ճնշումների հնարավորությունը, նշեց, որ ճնշումներ լինել չեն կարող և չեն եղել: «Տիգրան Կարապետյանը հայտարարել է, որ, հաշվի առնելով իրավիճակը, հանուն Գորիսի, հանուն նրա, որ պառակտվածություն, հասարակության մեջ ինչ-որ ընդվզումներ չլինեն, մարդը նպատակահարմար է գտել ինքնաբացարկ հայտնել»,- ասաց նա:
Հակոբյանը նաև նշեց, որ Գորիսում դանակահարության վերջին դեպքը քաղաքապետի ընտրության հետ կապ չունի: «Որտեղի՞ց նման ինֆորմացիա: Ես ասում եմ՝ տեղի է ունեցել ծեծկռտուք, և քրեական էլեմենտներ կան, ու դա իրավական դաշտում է: Անցյալ տարվա դեպքը դեռևս դատարանում է»,- ասաց նա:
Հարցին՝ արդյոք նա Գորիսի քաղաքացիների անվտանգությունը կարող է ապահովել որպես մարզպետ, Հակոբյանը նշեց, որ իր լիազորությունների շրջանակներում իրականացնում է դա: Դիտարկմանը՝ այսինքն՝ գորիսեցիներն ազատ են իրենց կամարտահայտության մեջ, մարզպետը պատասխանեց. «Իհարկե, ինչի՞ մասին է խոսքը»։
