«ՕԵԿ-ը դեռ 2008-ին կողմնորոշված` իր հայտարարությունն անում էր՝ գալիք 20013 թ. ընտրությունների հետ կապված: Մեր դիրքորոշումը չի փոխվել, մենք պաշտպանելու ենք գործող նախագահ Սերժ Սարգսյանի թեկնածությունը: Բայց սա մեզ չի կաշկանդում մասնակցել քաղաքական խորհրդակցություններին՝ առաջարկված տարբեր կուսակցությունների կողմից»,- «Հ2» հեռուստաընկերության «Խոսքի իրավունք» հաղորդման եթերում ասել է ՕԵԿ փոխնախագահ և ԱԺ նույն խմբակցության անդամ Հովհաննես Մարգարյանը:
Նա հիշել է, որ իրենք մասնակցել են 100 տոկոս համամասնական ընտրակարգի վերաբերյալ քննարկմանը: Ինչ վերաբերում է ՀՅԴ-ի և ԲՀԿ-ի առաջարկություններին, Հովհաննես Մարգարյանը նշել է, որ կառավարման խորհրդարանական համակարգին անցնելը ժամանակավրեպ է, սակայն այն քննարկելու համար դեռ ոչ ՀՅԴ-ից, ոչ էլ ԲՀԿ-ից հրավեր չեն ստացել. «Մեր կուսակցության դիրքորոշումն է, որ սա ժամանակավրեպ է, հասարակությունը դեռ պատրաստ չէ»: 100 տոկոս համամասնական ընտրակարգը ևս, ըստ նրա, պետք է ժամանակի ընթացքում կատարվի:
Հովհաննես Մարգարյանն ասել է, որ լավ կլինի քաղաքական ուժերը շուտ կողմնորոշվեն նախագահական ընտրություններում առաջադրվել-չառաջադրվելու վերաբերյալ, որպեսզի հանրությունն իր անելիքը իմանա:
Վերջին օրերին հակամարտություն էր սկսվել ՀՀՇ վարչության նախագահ Արամ Մանուկյանի և Հովհաննես Մարգարյանի միջև: Արամ Մանուկյանն ասել էր, թե ՕԵԿ-ի հետ համագործակցելու ցանկություն չունեն, ՕԵԿ-ը ուժ չէ և նման այլ բաներ: «Ես չեմ հիշում որևէ դեպք, բացի հռչակագիրը ընթերցելուց, որ (Արամ Մանուկյանը) աչքի ընկած լինի: Այն մարդիկ, որ հայտնի են իրենց բազմակուսակցական անցյալով, փորձում են իրենք այլանդակել քաղաքական դաշտը»,- ասել է Հովհաննես Մարգարյանը և հավելել. «Մենք չենք պատրաստվում համագործակցել կերպարանափոխվելու ֆանտաստիկ կարողություններով օժտված, կուրորեն չարությամբ լցվածների հետ: Չեք կարող բերել մի օրինակ, երբ ՕԵԿ-ը որևէ անգամ փորձել է ցեխ շպրտել, բայց երբ փորձեն, մեկի դիմաց տասը կստանան: Ունենք բավարար զինանոց, համարձակություն»:
Ըստ Հովհաննես Մարգարյանի՝ այն մարդիկ, որոնք ասում են, թե քաղաքական դաշտում ՕԵԿ չկա, իրենց նախանձում են:
