«Օդանավակայանը հնարավորինս փորձում է համագործակցել «Արմավիա»-ի հետ. այս տարվա սկզբից տրամադրվել են հատուկ սակագներ: Մենք ինքներս ուրախ չենք դրա համար, սակայն «Արմավիա»-ին օգնելու համար մենք համաձայնեցինք՝ մինչև «Արմավիա»-ն լուծի իր ֆինանսական խնդիրները: Մյուս կողմից` օդանավակայանը մեծ ներդրումներ է կատարել, որի արդյունքում տարածաշրջանում լավագույնն է: Մենք շարունակելու ենք համագործակցել «Արմավիա»-ի հետ և պաշտպանելու ենք մեր իրավունքները: «Արմավիա»-ն պետք է հասկանա, որ անհրաժեշտ է վճարել այն ծառայությունների համար, որ ստանում է»,- այսօր լրագրողների հետ հանդիպմանը ստեղծված իրավիճակը այսպես մեկնաբանեց «Արմենիա» միջազգային օդանավակայաններ ընկերության գլխավոր մենեջեր Մարսելո Վենդեն:
Ըստ նրա՝ ներկայում «Արմավիա»-ի պարտքը շատ ավելի գերազանցում է այն գումարը, որ համաձայնեցվել էր գարնանը երկու երկրների միջև:
Անդրադառնալով MBI ավիաընկերության գործունեության դադարեցմանը ՀՀ-ում` նա հայտարարեց, որ սակագնի մասին խոսք չի եղել, իսկ պատճառն այն էր, որ MBI-ն ձեռք է բերել «Բրիտանական ավիաուղիները», որը նպատակահարմար չգտավ շարունակել թռիչքները, քանի որ դրանք համակցված էին դեպի Իրան չվերթի հետ, և քաղաքական նպատակով այլևս չէին իրականացվելու:
Ընկերության ներկայացուցչի խոսքով` «Լոտ» ավիաընկերությունը ձմռանը դադարեցնում է դեպի ՀՀ իրականացվող չվերթները, ամռանը վերսկսում, և ի սկզբանե պայմանավորվածությունն այդպիսին է եղել:
Մ. Վենդեն հայտնեց, որ, բացի «Ալիտալիա»-ից, շուտով չվերթներ կիրականացնի իտալական մեկ այլ ընկերություն ևս՝ «Ռայն էյր»-ը, որի հետ բանակցություններ են ընթանում: Այդ ընկերությունն աշխատում է տոմսերի ցածր արժեքով և չվերթներ է իրականացնում աշխարհի տարբեր ուղղություններով:
