Օլանդի այցը ՀՀ տեղի ունեցավ ծայրաստիճան ջերմ մթնոլորտում: Այսօր Մամուլի ազգային ակումբում «Աշխարհը և մենք» ծրագրի և «Ֆրանսիայի նախագահ Ֆրանսուա Օլանդի` Հայաստան այցի արդյունքների ամփոփումը» թեմայի շրջանակներում լրագրողների հետ հանդիպման ժամանակ այս մասին ասաց ՀՀ-ում Ֆրանսիայի արտակարգ և լիազոր դեսպան Անրի Ռենոն:
Բանախոսը նշեց, որ այցը կարելի է որակել որպես շատ հաջողված, որն անցավ ծայրաստիճան ջերմ մթնոլորտում, և որը հաջողված հանդիպում էր: Իմիջիայլոց, նրա դիտարկումներով՝ այցի արդյունավետության և ջերմ մթնոլորտի ընկալումը երկուստեք նույնպիսին էր, քանի որ ոչ միայն ֆրանսիական, այլև հայկական կողմը գոհունակություն հայտնեց այդ այցի առնչությամբ: Դեսպանի խոսքով ՝միայն այն հանգամանքը, որ վերջին նախագահական այցից հետո երկուսուկես տարի էր անցել, հաստատում է հայ-ֆրանսիական հարաբերությունների սերտությունը:
«Օլանդի հայաստանյան այցի ամենակարևոր ուղերձներից մեկն այն էր, որ եկող տարի Հայոց ցեղասպանության հարյուրամյա տարելիցի առիթով Ֆրանսիայի նախագահը լինելու է ՀՀ-ում: Սա բավականին ուժեղ հայտարարություն էր մի երկրի գերագույն ղեկավարի կողմից, երկիր, որը, եթե չեմ սխալվում, օրենքի ուժով ճանաչել է Հայոց ցեղասպանությունը:
Կարևոր հանգամանք է նաև այն, որ հարյուրամյա տարելիցին մասնակցելու լուրն արվեց տարելիցից մեկ տարի առաջ, մի բան, որը ևս մեկ անգամ հաստատում է Ֆրանսիայի որդեգրած հստակ ռազմավարությունը: Հետաքրքիր ուղերձ էին Հայաստանում ԵՄ-ՀՀ հարաբերությունների մասին նրա դիտարկումները, իր ուղերձում նախագահ Օլանդը բավականին հստակ կոչ արեց ընկալել քաղաքական իրավիճակը, որում Հայաստանն է: Այդ իրավիճակի քաջ ըմբռնումով կոչ արեց որոնել մեկ այլ ճանապարհ, բանաձև, որը հնարավորություն կտա Հայաստանին ասոցացնել ԵՄ-ի հետ: Սա ևս մեկ անգամ ապացուցում է Ֆրանսիայի Հանրապետության խորը վերլուծական գործընթացները և դրանց արդյունքում որդեգրած վճռական դիրքորոշումը:
ԼՂ հակամարտության հրադադարի ստորագրման պայմանագրի 20-ամյակը համընկավ այցի հետ, հանրապետության նախագահն ընդգծեց ևս մեկ անգամ ԼՂ հակամարտության կարգավորման բացառապես խաղաղ տարբերակով լուծում գտնելու անհրաժեշտությունը՝ հիմքում ունենալով Մադրիդյան սկզբունքները:
Այցի տնտեսական բաղադրիչը, բնականաբար, ևս կարևոր էր: Ֆրանսիան Հայաստանում արտասահմանյան առաջին ներդրողն է, և, բնականաբար, հարկավոր է այնպես անել, որ տնտեսական հարաբերությունները հասնեն այն մակարդակին, որոնք այսօր գրանցված են քաղաքական հարաբերությունների ոլորտում, և այնպես անել, որ տնտեսականը համահունչ լինի քաղաքական դերակատարությանը ևս: Անցկացվեց տնտեսական համաժողով՝ որպես տնտեսական համագործակցության կարևոր բաղադրիչ, որի շրջանակում էլ մոտակա աշնանը ենթադրվում է առաջին «Կարֆուր» հանրախանութի բացումը, որի տարածք այցելեց նախագահը»,- ասաց դեսպանը:
Նա հավելեց, որ այցը անմասն չէր հուզական շեշտադրումից ևս, քանի որ այցի երկրորդ օրը նախագահական այցի շրջանակում նախատեսված էր մասնակցություն ՀՀ-ի կենտրոնական հատվածներից մեկում Միսաք Մանուշյանի անվան այգու բացման արարողությանը:
