ԱԺ անկախ պատգամավոր Էդմոն Մարուքյանը այսօր Ազգային ժողովում 2013-ի բյուջեի կատարողականի հաշվետվության ներկայացմանը փոխոստիկանապետ Արթուր Օսիկյանին դիմելով՝ հիշեցրեց, որ ժամանակին կանխատեսում էին շրջիկ մեքենաների թվի նվազեցում:
«Ճանապարհային ոստիկանության տեսուչների կողմից կազմվող ակտերը նվազել են: Ժամանակին, եթե չեմ սխալվում, երբ ներդրվում էին տեսանկարահանող սարքերը, ասում էին՝ շրջիկ մեքենաների թիվը նվազելու է»,- ասաց նա:
Օսիկյանը նշեց, որ շրջիկ մեքենաները պակասեցնելու խնդիր չի դրվել: Իրենք այն ժամանակ ներկայացնում էին, որ այն վայրերում, որտեղ տեղավորված են լինելու համապատասխան սարքավորումները, կնվազեցվի շրջիկ մեքենաների տեսանելիությունը, այսինքն՝ երկակի աշխատանք չի կատարվի՝ և տեսանկարահանող սարք լինի, և մեքենա:
«Այնքան խնդիրներ կան ճանապարհային երթևեկության բնագավառում, որ չեն կարողանում ամբողջ հանրապետությունը փակել այդ արագաչափերով, բնական է՝ շրջիկ մեքենաներն իրենց դերը կամ գործառույթներն իրականացնելու են, ուղղակի նույն վայրերում չեն իրականացնելու»,- ասաց նա:
