Թուրքական Zaman թերթի փոխանցմամբ, Անվտանգության ծառայության աշխատակիցները «Էրգենեքոն»-ի գործի շրջանակներում խուզարկություն են իրականացրել Oda-Tv-ի շենքում, որի ժամանակ էլ հայտնաբերել են մի շարք հետաքրքիր փաստաթղթեր:
Դրանցից մեկում նշված էր, որ հենց Oda-Tv-ի գլխավոր տնօրեն Բարըշ Փեհլիվանն է «Էրգենեքոն»-ի գործով կասկածյալ, գիտնական Յալչըն Քյուչուքին հրահանգ տվել` բարձրաձայնելու նախագահ Գյուլի մոր հայկական ծագման մասին:
Փեհլիվանը նշել է, որ տվյալ խնդրի շուրջ խորհրդակցել է Oda-Tv-ի սեփականատեր Սոներ Յալչընի հետ և եկել այն եզրահանգման, որ հայկական արմատներ ունեցող անձը Թուրքիայում չի կարող բազմել նախագահական աթոռին:
Նշվում է, որ Գյուլի հայկական արմատների մասին լուրն առաջին անգամ շրջանառության մեջ է դրվել 2007 թվականին կայացած նախագահական ընտրությունների նախաշեմին, ապա այն շարունակ օրակարգում է պահել գլխավոր ընդդիմադիր ուժ հանդիսացող Ժողովրդա-հանրապետական կուսակցությունը (ԺՀԿ) ներկայացնող, Իզմիրից ընտրված կին խորհրդարանական Ջանան Արըթմանը:
Հիշեցնենք, որ թուրք պաշտոնյաների հայկական ծագում ունենալը հանդիսանում է թուրքական քաղաքական շահարկումների զինանոցի կարևոր տարրերից մեկը:
Մասնավորապես, երբ 2008 թվականի դեկտեմբերի կեսերին Գյուլը դրական գնահատեց մի խումբ թուրք մտավորականների նախաձեռնությամբ 1915 թվականի իրադարձությունների համար հայերից ներողություն հայցելու ստորագրահավաքը, Ջանան Արըթմանը հանդես եկավ Գյուլի մոր հայկական ծագման վերաբերյալ հայտարարությամբ:
Սակայն Գյուլը նախ հրապարակավ ասաց, որ իրենց տոհմը թուրք է և մուսուլման, այնուհետև մամուլում տպագրվեց Գյուլի ընտանեկան տոհմածառը (վերջերս էլ նշվեց, որ Գյուլի հայրն ամուսնացել է իր մորաքրոջ աղջկա հետ): 2009 թվականի գարնանը Թուրքիայի նախագահը դատի տվեց Արըթմանին և շահեց դատը` ստանալով խորհրդանշական 1 թուրքական լիրա փոխհատուցում:
Ի դեպ, այս տարվա հունիսին կայանալիք խորհրդարանական ընտրություններից առաջ`փետրվարի կեսերին, Թուրքիայում հրապարկվեց ԺՀԿ նախագահ Քեմալ Քըլըչդարօղլուի հայկական ծագում ունենալու մասին «Դերսիմցի հայ Եմուշ խանումի որդի ինժեներ Քեմալը» գիրքը: