Եվրախորհրդարանի այս ընտրությունները զգալի ազդեցություն կունենան ԵՄ-ի ներքին և արտաքին քաղաքականության վրա՝ կարծում է The Washington Post-ի լոնդոնյան բյուրոյի ղեկավար Գրիֆ Վիտեն:
Եթե նախկինում եվրոպական քաղաքականությունը կառուցվում էր աջակենտրոնների և ձախակենտրոնների միջև հիմնական հարցերում կոնսենսուսի հիման վրա, ապա հիմա հիմնական պայքարը ծավալվում է կենտրոնամետ և արմատական կուսակցությունների միջև: Ընդ որում՝ արմատականները միավորներ են հավաքում եվրոպական տնտեսության շարունակվող լճացման պայմաններում՝ կարծում է լրագրողը:
Եվրոպական ընտրություններում հաջողության հասած քաղաքական կուսակցությունները լրացուցիչ ազդեցություն կստանան սեփական երկրների ներքին քաղաքականության վրա՝ գրում է Վիտեն:
Ինչ վերաբերում է արտաքին քաղաքականությանը, հաղթելու դեպքում արմատական կուսակցությունների ներկայացուցիչները կօգնեն ուկրաինական ճգնաժամը դարձնել գլխավոր հարցերից մեկը խորհրդարանում: Ինչպես ուլտրաաջերը, այնպես էլ՝ ուլտրաձախերը հիանում են Պուտինով, որի մեջ տեսնում են յուրատեսակ «ավանդաբար մտածող ալֆա-արուի», որի պակասը հենց Եվրոպայում սուր զգացվում է՝ կարծում է Վիտեն: Ուստի, նրա խոսքով, ԵՄ-ից դուրս ոչ ոք ընտրություններին այնքան համակ ուշադրությամբ չի հետևում, որքան Ռուսաստանի նախագահը:
Այս կամ այն քաղաքական ուժի հաջողությունը Եվրախորհրդարանի ընտրություններում այս տարի հատկապես նշանակալի կլինի օրենսդիր մարմնի լիազորությունների ընդլայնման շնորհիվ: Օրինակ՝ խորհրդարանականները կկարողանան հաստատել Եվրախորհրդարանի ընտրված նախագահին: