Բեյրութից Հալեպ տանող ճանապարհին հոկտեմբերի վերջին առևանգված յոթ հայերից երկուսը` հայր ու որդի Բաշար և Ջորջ Ռաբաթներն ազատ են արձակվել: Այս մասին «Արմենպրես»-ին տեղեկացրել է Բերիո թեմի ազգային առաջնորդարանի մամլո քարտուղար Ժիրայր Ռեյիսյանն` նշելով, որ մյուս առևանգվածներից, սակայն, դեռևս տեղեկություն չկա, ջանքեր են գործադրվում նրանց ազատ արձակելու ուղղությամբ: Լուրեր են շրջանառվում, որ Ջորջ և Բաշար Ռաբաթներն ազատ են արձակվել փրկագին վճարելուց հետո:
Ինչ վերաբերում է նոյեմբերի 7-ին լրատվամիջոցների տարածած տեղեկությանն այն մասին, որ Բեյրութ-Հալեպ ճանապարհին Սարաքեբ բնակավայրի մոտակայքում օրեր առաջ առևանգված հայազգի Սաքո Կոզանյանն ազատ է աձակվել, Ռեյիսյանը տեղեկացրեց, որ լուրը չի համապատասխանում իրականությանը: Ռեյիսյանի խոսքով` նրա ընտանիքի անդամներն իրենց որդու վերաբերյալ տեղեկություն փորձել են ստանալ Բերիո թեմի ազգային առաջնորդարանից:
Մամուլի քարտուղարը նաև ավելացրել է, որ Հալեպի որոշ թաղամասերում շարունակվում են բախումները: Կրակոցների ձայները լսվում են նաև հայկական թաղամասերում:
Սիրիայում ավելի քան 18 ամիս շարունակվող բախումների հետևանքով զոհվել է 30 հազարից ավելի մարդ, այդ թվում` չորս տասնյակից ավելի հայեր: Իսկ հոկտեմբերի 29-ի երեկոյան 18:00-ի սահմաններում զինյալները Բեյրութից Հալեպ քաղաքացիական ավտոբուս են կանգնեցրել Հալեպի մոտակայքում գտնվող Սարաքեբ քաղաքում: Նրանք իրենց մոտ են պահել 11 ուղևոր տղամարդկանց, որոնցից յոթը հայազգիներ են, ևս երեքը՝ քրիստոնյա արաբներ: Հայտնի է առևանգված հայերի ինքնությունը` Կարո Փամփալյան, Արսեն Արոյան, Լևոն Զեյթունյան, հայր և որդի Բաշար և Ջորջ Ռաբաթներ: