Սյունիքի նախկին մարզպետ Սուրիկ Խաչատրյանը վստահեցնում է, թե ինքը տեղեկություն չունի Գորիսի քաղաքապետի թեկնածուներ Արա Բուդաղյանի և Տիգրան Կարապետյանի ինքնաբացարկի պատճառներից և ոչ էլ առհասարակ լսել է նրանց ուղղված սպառնալիքների մասին:
ԳԱԼԱ-ի հետ զրույցում այս մասին ասել է Սյունիքի նախկին մարզպետը՝ ընդգծելով. «Առաջադրվողը իրանք են, բացարկ հայտնողը՝ իրանք. ես ինչ կարող եմ ասել»:
Նշենք, որ դեռևս մեկ շաբաթ առաջ ԳԱԼԱ-ին տված հարցազրույցում Ս. Խաչատրյանը վստահություն էր հայտնել, թե հունիսի 9-ին Սյունիքի մարզի Գորիս քաղաքում սպասվող ՏԻՄ ընտրություններում հաղթելու է ՀՀԿ-ական թեկնածուն՝ Վաչագան Ադունցը: Հիշեցնենք, որ այսօր քաղաքապետի թեկնածուներից երկուսը՝ Արա Բուդաղյանը և Տիգրան Կարապետյանը, ինքնաբացարկ են ներկայացրել: Տ. Կարապետյանն էլ ավելի վաղ նշել է, թե սպառնալիքներ ու վախ կա: Asparez.am-ին տված հարցազրույցում ևս ասել է, թե մարդիկ են կանչվում նախկին մարզպետի տուն, վախեցնում են նրանց:
ԳԱԼԱ-ի հարցադրմանը, թե ինչ հիմքով են շահարկվում այդ տեղեկությունները՝ Ս. Խաչատրյանը հակիրճ արձագանքեց. «Էդքան արժանիք չունեն, որ ես իրանց մեր տուն կանչեմ, սա մեկ, և երկրորդն էլ՝ ես ընդհանրապես որևէ առնչություն չունեմ էդ հարցերին: Ընտրությունները կանցնեն շատ նորմալ ու խաղաղ պայմաններում: Ես իհարկե ժխտում եմ այն փաստարկները, թե իրենք սպառնալիքների արդյունքում են հանել իրենց թեկնածությունները»:
Մանրամասները՝ ԳԱԼԱ-ում
