Մեծ Բրիտանիայի Բիրմինգհեմ քաղաքում ուսուցիչը վերցրել է 16-ամյա աղջկա բջջային հեռախոսն ու կոտրել՝ ղեկավարությանն ապացուցելու համար նրա «արգելված» կապը համադասարանցու հետ: Այս մասին հայտնում է RT կայքը: Ուսուցիչը փորձել է կարդալ նրա հաղորդագրություններն ու նայել լուսանկարները:
Սա տեղի է ունեցել պահպանողական մուսուլմանական դպրոցում, որտեղ տղաներին ու աղջիկներին առանձին են նստեցնում և բոլոր աշակերտներին կոչ են անում պահք պահել քննություններից առաջ:
Park View դպրոցի աշխատակիցները պնդում են, որ հեռախոսի մեջ ուսուցիչը գտել է նույն դպրոցի աշակերտի հետ լուսանկար, նաև նրանց SMS-նամակագրությունը, որոնք հետո օգտագործվել են որպես նրանց «արգելված» կապի ապացույց: Շուտով աղջկան 2 շաբաթով հեռացրել են դասերից: Նրա մայրը հայց է ներկայացրել ոստիկանություն՝ ասելով, որ իր աղջիկը թույլ չի տվել նայել լուսանկարները, և որ դա ուղղակի միջամտություն է նրա անձնական կյանքին:
Հայտնում են նաև, որ դպրոցականներին խստորեն խորհուրդ են տվել պահք պահել ավարտական քննությունից առաջ (մասնավորապես՝ լուսաբացից մայրամուտ չուտել), որպեսզի գան «ոգու ճիշտ վիճակի»:
Ներկայումս Բիրմինգհեմի, որի բնակչության 22%-ը մուսուլմաններ են, քաղաքային խորհուրդը ստուգում է անցկացնում 25 դպրոցներում, որտեղ, ըստ ստացված տեղեկության, ուժեղացել է արմատական իսլամիստների ազդեցությունը:
Հայտնի է դարձել, որ արմատական քարոզիչները դպրոցներում տարածում են կրոնն ու դուրս հանում հայրենական ուսուցիչներին ու ղեկավարներին:
Ավելի վաղ The Telegraph-ը տեսանյութ էր տարածել, որում Բրեդֆորդի Կրթական մուսուլմանական համաժողովի ղեկավար Ֆայզալ Հանը, որը կասկածվում է ընդհատակյա գործունեության մեջ, պատմում է, թե ինչպես են ինքն ու իր գաղափարակիցներն աշխատել «մի քանի տարվա ընթացքում» քաղաքի դպրոցներից «ղեկավարներին հեռացնելու» նպատակով: «Մենք պետք է այդպես անենք յուրաքանչյուր դպրոցում»,- ասել է նա: Ինքը՝ Հանը, հերքել է այդ մեղադրանքները: Նա պնդում է, որ ինքը մտադրություն չի ունեցել դպրոցները «իսլամականացնելու»:
