Ուկրաինան ԱՄՆ-ից օգտագործված զրահամեքենաներ, հետախուզական տեխնիկա և զրահաբաճկոններ է խնդրել, որոնք դուրս կգրվեն ու կվաճառվեն Աֆղանստանից ամերիկյան զորքերի դուրսբերման ավարտից հետո: Այս մասին, ինչպես փոխանցում է Defense News-ը, հայտարարել է Ուկրաինայի պաշտպանության նախարարի նախկին տեղակալ Լեոնիդ Պոլյակովը: Նրա խոսքով՝ որոշ երկրներ, այդ թվում՝ ԱՄՆ-ը, կարող են առանց դժվարության տրամադրել ռազական տեխնիկա՝ ի հավելումն այն սպառազինության, որն Ուկրաինան կարող է գնել ինքնուրույն:
Դեռևս հայտնի չէ, թե սպառազինության և ռազմական տեխնիկայի ինչ տեսակներ է Ուկրաինան խնդրել ԱՄՆ-ից: Պոլյակովի փոխանցմամբ՝ խոսքը բժշկական սարքավորումների, սաղավարտների, զրահաբաճկոնների, անօդաչու սարքերի, գիշերային տեսանելիության սարքերի, ռադիոէլեկտրոնային պայքարի սարքավորումների և կապի պաշտպանված միջոցների մասին է: ԱՄՆ կառավարությունոմ ավելի վաղ հայտարարել էին, որ պարբերաբար ուսումնասիրում են ուկրաինական իշխանություններից ստացվող տարբեր խնդրանքներ:
Նոր դիմումի վերաբերյալ հստակ պայմանավորվածություններ դեռևս ձեռք չեն բերվել:
Ուկրաինայի իշխանությունները նշում են, որ սպառազինությունն ու ռազմական տեխնիկան իրենց անհրաժեշտ են Ռուսաստանի ներխուժումից պաշտպանվելու, ինչպես նաև երկրի տարածքային ամբողջականությունը պաշտպանելու համար:
